天與地

好多朋友覺得我做有錢人秘書，一定好易識到有錢仔，其實我來之前都有這樣的想法，至少我希望upgrade自己的生活同眼界。而事實上，現實並非如此。

我老闆是香港100%隱形富豪，香港，甚至大陸最出名的幾個富商、明星都是他的好朋友。有時飯局我會見到佢地，但平時接觸得最多是他們的助手同秘書。同樣地，外人想見我老闆，都不是件容易的事，一定經過我的filter。

其實俾我再選，我唔會選做太有錢人的秘書，因為佢地要求高，又好多機密野，好多唔俾得人知，就算俾我知道左，要好守得秘密；而且佢間屋太大，狗屎垃圾都要理埋，前排先忙完裝修搞到我一頭煙。做秘書，就係大至一些好重要的機密，到小至屋企隻狗拗柴都關你事，而且要以一貫專業的做法處理，要做得好好睇睇。

第二我唔鍾意做太有錢人的秘書，就是佢地唔多唔少睇你唔起，我最憎我老闆覺得佢啲friends好巴閉，come on!我唔恨見到明星，亦唔恨見到富豪，而的確地，佢地真係識你老鼠，記得下你叫咩名同個樣已經好好。所以我都好憎應酬呢啲人。

第三，可以親近我老闆的，都是位高權重的人，普通經理仔無資格見佢，所以日日來office的客人，都是上左年紀的阿叔，好少後生仔，所以咁耐以來，我都無在工作上發過市 (that’s why我話好悶）。唯一有得望下的，就是這些阿叔啲仔，不過好多其實都仲好細個，廿一、二歲讀緊大學。

但，都有一個係同我一樣大既！我接觸最多是他的父母，即我老闆的好朋友，是我見過最好最好的老人家兼客人，超有禮貌，對我們這些「下人」都無架子，次次上來都會買野俾我同其他同事食，又會俾tips俾司機。他的兒子秉承父母的謙虛有禮，自小受良好教育，人又靚仔又斯文，上親來都會對我微笑 （好多其他客對眼生響額頭度），教Betty每次見到他都有少女心跳的感覺！

這就是「天」。

每個女仔都渴望識到個咁好條件既男仔，但當這個人真的出現在面前時，作為背景草根，條件普通的女生，有著說不出的自卑，你咩新鮮蘿蔔皮配得起人？先不說人家有無女朋友 （無見佢戴介子，google佢主要講佢工作，私人生活好低調無人寫過），有時我望住塊鏡，雖然也算是個靚女，但說到好好條件的男生，再看看其他阿叔的千金，讀長春藤大學，放假係去new york睇fashion show,我就覺得自己好渺小，好無自信。

再說，其實我老闆唔鍾意我同啲客太熟，要保持返距離，始終大家身分不同。所以俏秘書識有錢仔，只有2個可能性：

1. TVB drama
2. 秘書同老闆/客有路 （即係有某種特殊關係，你懂的～）

否則一般秘書在客的層面上其實好卑微，當然在辦公室來說，我是老闆身邊的人，無人敢得罪我，公司的人同事，老闆都會問我意見。

  
上次Lovestruck我講漏左第8個騎哩怪，佢好多野講，對我好似好有興趣，但我實在忍受不到在Lovestruck mailbox當msn咁傾，login/out好煩，我等了2星期佢都唔開口，於是我主動將我的wechat告知他，叫佢add我，點知佢答我：

「我無wechat架！」

然後繼續轟炸我的Lovestruck mailbox，下場當然是再得不到我的回覆。而他真的無去嘗試download wechat去add我。come on阿生，你而家係俾左錢想識女仔，每一個女仔的contact都好珍貴，家下我主動俾你你都唔要，你係咪傻架？就等如有個靚女同你講：

「你可唔可以錫我一啖？」

「我⋯⋯我⋯⋯我唔識錫女仔架！我⋯⋯我怕醜！」

你係個女仔係咪想星巴佢先？

這是「地」。

再最近Betty join左一個yoga group,有個男仔message我：

“Hello, I call Peter”

Call? 呢句係英文定廣東話？

算啦，都有覆佢，到夜晚：

“You sleeped yet?”

其實我不是歧視英文不好的人，但一些grammar mistakes係好基本，小學生都識，可以想像得到呢個人條件有幾好，同以這樣的英文如何在公司做到高職位。這樣的email send出街，真係笑大人個口兼嚇親人。

天與地，相差太遠。Betty夾在中間，有點思覺失調。

90後的妹妹

今個post我想說一下我公司的一名妹妹，利申我唔否認有些純粹是她個人的性格，與她是90後無關，我會盡量客觀地將她的性格分返出來。

作為一個80後女生，初出來做野俾70後阿姐話我們80後做野無交帶，不上心同唔用腦，唔知我們諗咩。到我今天為人阿姐，我覺得現今的90後，大致可以分兩種：有一種是真係唔知佢諗咩，辭職可以粒聲唔出走左去，做野做一半無左另一半，做錯野唔覺得自己有問題只會覺得你話佢，唔來見工電話都無個simply no show等等。坦白講，當年的我們，未致於會咁！

第二種呢，就是我呢個阿妹，1991年生，今年24，至今在我公司工作一年鬆一點。老實說，其實都唔細，李嘉欣18歲已經做香港小姐。我覺得90後可能睇得電影多，佢地識好多手段，但共通的弱點是人生經驗不夠，就來跟我們這些老屎忽玩，真係未死過！遇著Betty呢些心地好既，我最多係忌下你，同唔會咁信任你；但遇著個衰既，一早送左去歸西。

我Betty唔識手段，但我有的是人生經驗，姐出來社會打滾，妳還在讀初中阿妹！簡介下阿妹先：

1. 好聰明 （天資）
2. 去過working holiday有點見識 （係「有點」，稍後詳談）
3. 識睇人眉頭眼額，但擦鞋擦得太低裝，俾人睇得穿
4. 去旅行次次都每人買一份禮物，人人有份永不落空 （咁我公司得10幾個人既）。初時我覺得佢純粹鍾意shopping，耐左就知佢係想拉攏人心
5. 來我呢度長工來講只係第二份，consistent working experience一年都唔夠
6. 學歷IVE
7. 周圍同人傾計套料，包括我幾錢人工
8. 覺得自己多方面都做得好好，自己唔止呢個價 （$12,000)
9. 兩頭蛇，見邊個勢頭好就痴邊個，講是非根據唔同圈子而夫唱婦隨

90後，就是不夠腳踏實地，阿妹妳才一年經驗加去左一年working holiday咁大把，萬二都俾多妳，作為一個全公司最junior的admin+哎呀receptionist，公司都照俾3個月bonus妳，仲走來同我講妳underpaid? 

「Betty，我覺得我做到Gubi (正印receptionist) 做到既野，聽電話同開門咋嘛，點解佢人工高過我？」

首先我唔知佢點解會知道Gubi幾錢人工，第二係Gubi 在佢鄧腳以外7小時做點什麼，她知道嗎？要做一個係老闆同management都鍾意的receptionist，是妳想像中咁容易、咁簡單嗎？妳只是鄧腳，大家當然對妳沒有任何要求，但這不代表妳咁叫做「做得好好」，大條道理要加妳人工。第三，Gubi做左10年野，妳呢？才一年，有什麼資格bargain同Gubi同一份人工？

「我在Flora放產假時頂哂她的工作，我也做得來呀，而且我現在所有事都上手了，Flora現在沒有我不行呢！」

我們知道妳新，很多以前Flora在做而重要的事，其實已交給另一位同事處理，這些Flora無必要同妳講，只把最簡單而相信妳做得到的事交給妳。最後，就是Flora太忙，我們才請一個junior給她，妳的職責是去輔助她，而不是妳認為自己可以取代她。有屎Flora都自己食左了，沒有Flora，妳才不行。

我不否認佢係好聰明，做野好快手，亦做得不錯，但不應該覺得其他同事係廢柴，而自己是最叻那個，這叫無知。

  
做新人，應該要謙虛有禮，虛心學習。阿妹幸運入到我們公司，因為我們都是很善良的人，給空間她發展，不給她壓力，給她非常適中的工作量，以致她覺得自己太好了，是公司辜負了她，給她這麼少的人工。

阿妹，出到去，以妳的學歷同工作經驗，做admin想有萬六蚊人工？發夢吧！身在福中不知福。

她這種90後下屬，如果俾佢搵到機會涉上位，肯定是個見利忘義的人，為了目的不擇手段，踩住人上那種人。

踩住人上，描述她最適合不過。

這種90後，就是我無論如何都不會升她的一種下屬。就看妳離開我們公司，在外幹得有多漂亮。

Lovestruck用後感

其實一直都想寫，有時唔得閒，有時無mood，但我發現我寫的Lovestruck blog keep住有人睇，所以我都想分享下。

坦白講，如果有好特別的感受，我一早就寫左，不過真係無乜料到，加上我玩之前無咩期望，所以都無話好失望。我在membership到期前一日識左個韓國肥仔，類似金正恩咁既樣加副眼鏡，本來無咩興趣，係臨尾叫做打包埋唔好蝕，所以最後加在我wechat的有：

1. A貨金正恩 28
2. 香港普通高瘦四眼男 28
3. 48歲醫生 （之前我post有提及過佢）
4. 在廣州做酒店的準博士生 38
5. 死話要見面不想浪費時間chit chat的不知所謂男 38
6. 見面甩底仲講大話的美國男 42
7. *23/8 update* 妄想成為全港最top的前地產經紀 30

Online Dating令我心灰意冷的地方，就是明明都無咩興趣，但最後都係得個桔。即係識左叫有人追下獻殷勤，都叫做有點世藝。

我只可以講，好多現實生活中識唔到女仔的男仔，性格都有嚴重缺憾，好怕做主動，同好介意女仔的一舉一動。例如醫生咁，我只係無覆佢一次message，佢就唔敢再搵我；4眼男係好怕搵話題，有時傾到悶悶地，佢係無嘗試講點什麼可以令大家了解多一點，例如佢可以問下我工作、屋企、興趣，唔係下下我做女仔去搵話題。博士呢，係個自視好高的人，佢講左句：「如果我今年仲識唔到女朋友，我就會去讀博士」。我好直接同佢講，乜你想教書咩？佢話唔係，我話咁你不如慳返點錢買樓啦！都40歲，又有碩士了，仲讀乜鬼書⋯⋯ well 只係傾計咁傾，大家好明顯思路不同，唔岩key。死要見面那條友，唔該去搵援交啦，溝靚妹岩佢，我話我連你最基本的background、為人都不知道，見咩面？點解要見，為咩要見？想知我係咪豬排？係咪大肥婆？在我而言，見面係對對方有基本的認知，岩傾，想認識對方多一點，當然順勢睇埋對方外表合唔合心意，再決定可否進一步發展定係做普通朋友。我好憎男仔成日藉辭傾計浪費時間，見面最直接，其實根本就係以個女仔的外表行先，但講到大條道理。同埋我可以話你知，有好多其實出到來好鵪春，簡直不知所謂！仲要唔該，又唔係靚仔，仲幾矮，聲稱168，隨時出到來係165。

 
A貨金正恩呢，就係另一種情形，就係佢係oppa，對於好多有虛榮心的香港女仔，有個oppa男友好巴閉，所以佢都話，公司的女仔好鍾意搵佢食lunch，雖然⋯⋯佢係金正恩咁既樣，但響香港其實係有market，而且，其實金正恩肥嘟嘟都幾可愛呀，只係痴痴地線隨時掉個導彈出來。A貨金正恩其實係ABK，即係American Born Korean，講英文為主，識基本韓文。所以嘛，我覺得佢係後期響Lovestruck又好，公司又好識左第二個，所以就無再搵我了。

最後的美國男仲底死，whatsapp左約一個月，佢好興唔覆我幾日，之後又say hi撩傾計，所以我們的溝通係好間斷，到佢約我出來見，我覺得速戰速決啦，唔岩快點收大家皮不用浪費時間。本來約好星期六晚飯，但未約好去邊間餐廳，咁我等啦，等到星期六下午佢都無聲氣，咁我就message佢，而他是第二天的晚上11點幾才若無其事的回覆，對話如下：

 
你有無病呀？！

我其後媽叉佢一輪就block and delete! 佢之後仲話入左醫院昏迷左好多個鐘連電話都拎唔起所以通知唔到我，我竟然唔體諒佢令佢好傷心。條友都痴膠花，應該入電視台做編劇，呢個咁既故仔，連我8歲的表妹都唔會信。這些咪超級騎哩囉！竟然連見一個女仔的勇氣都無，但可能阿媽同朋友教落要主動約女仔去街，but come on, he is 42! 真係嚇親，世間上竟然有些咁既人。如果你真人無相咁靚仔後生，可以照直講，反正遲早都要面對。可想而知我對男人已經無要求都咁既地步，我都唔介意你間歇性覆我message，搏出來見可以速戰速決，都竟然咁幸運遇到咁騎哩的人。

有時我覺得online dating係睇人，有些人夠主動一玩就識到，但我Betty係個比較慢熱的人，我已經certify左online dating唔岩我。而且有好多真係搵食為主，真係想搵女朋友係好少數，而當中有好多正如我以上咁講好騎哩。我真係寧願去做多堂瑜珈好過！

*23/8 update* 第7位騎哩怪其實都好經典，我竟然唔記得左佢！追加都一定要講！30歲的一個肥仔，個樣尚算四正，無記錯住南豐新村，在美國讀大學回流返來，自己開賣運動用品的公司，小公司小生意。講講下，佢先講起以前係做地產經紀，話賣的是過千萬的單位，佣金好和味，覺得呢行好有前景，不過撈極都撈唔起，話呢個社會唔公平，啲人無實力，靠把口靠關係就搶到生意，佢唔服氣，到呢一刻都認為自己係可以上位的那一個。我話，做sales就係靠把口靠關係架啦，把口其實好值錢，你叫我陪飲酒做歡樂小姐氹客開心，我做唔到，所以我撈左咁多年PR都上唔到位，還好我立左心場轉行了，對以前多姿多彩的生活也沒有留戀。

肥仔知我做秘書，有點看不起我的工作，覺得只是個OL，問我「點解唔做sales? Sales搵到錢喎！」我心諗，又唔見你搵到錢？最後仲要轉行？我覺得條問題好白痴，我舉左個例，點解你唔去選港男？港男成名快喎，可以拍戲做明星，仲隨時搵到個闊太包養你,當然我係講笑咁講，都係傾下計。一個人要向前望，而不是活在過去，我Betty不嬲都好直，我話以你咁靜同咁唔進取的性格，根本唔適合做sales，而家開公司幾好，因為無咁黑暗，簡單啲。點知佢竟然嬲我咁話佢，鬧左我一輪然後block左我。識到我Betty咁老實點醒你，多謝都無聲，仲要不禮貌的block我。坦白講，我咁大個女都未俾男仔block過。

結論：一啲做事不切實際，活在過去，仲要小氣、不肯接受人批評、心胸狹窄的男人，真係OH MY GOD!