成為第二個馬雲

Disclaimer: 這篇blog可能包含一些宗教元素，Betty無任何宗教信仰，也無意侵犯任何教旨，本blog純粹個人有感而發的分享，也是給自己慣常睡前的pillow talk。

上回講到Tasha要搞生意，坦白說我是無限量的支持她，這星期來我給她很多Marketing & PR的意見，也給我老闆朋友做生意的模式同網站讓她參考，Betty簡直將3年來大學學到的PR東西，及這麼多年來在社會打滾的經驗全部俾唒佢！如果我不當她是好朋友，我根本不會這樣做，要知道這些東西是多麼的值錢，等如我話俾你知答案在第50-60頁，總好比你由第1頁睇到第300頁去搵答案。一個人做生意的成功，除左靠聰明機智同勤力，network都好重要。

其實Betty最近工作很不開心，要知道伴君如伴虎，而且個個都想在隻老虎身上搵著數，Betty要維護老闆利益，但又要安撫一群柴狼，要知道柴狼無性，也無操守可言，所以君子幾時都係怕小人，因為君子唔會做得出太low的行為，而一些爛仔係做得出。李嘉誠當年都係俾錢張子強打發佢走，無報警亦無追究，只是張子強貪得無厭再去敲詐李生，最終得來不能補救的惡果。

每次我同Tasha講，佢都好簡短咁覆我，電話又輕輕帶過就算。在她婚禮的一篇blog中，我早說過她是不太理身邊人和事的人，好聽點說個人唔八卦，亦唔講人是非，但呢一刻既Betty係好需要人安撫，佢可以鬧我處理人事關係得唔好，又或者安慰我，俾意見我點樣去正面面對問題，始終旁觀者清。

當我打到成個screen都係字，由於佢唔想評論邊個對與錯 （我太了解佢性格），亦無興趣去討論，而且又唔關佢事，所以佢唔想覆 （即係無覆），隔幾個鐘再message我講佢盤生意。Betty當時心傷透了，我期望的是你講點說話撐我，俾信心我去面對，而不是側側膊唔多覺。況且我對佢盤生意無興趣，我已經俾左好多意見同reference佢，真係無功都有勞。

「你註定係要來幫我，係上帝一早安排好。」Tasha說。「我而家會入紙請你做我employee，到時公司賺到錢，我俾到好高人工你，你就唔使再響度受氣。」

Again，我唔係覺得佢盤生意係唔work，只係而家咩都無，你憑咩應承我俾到好高人工我？Betty個人好實際大家都知，做人對自己有信心固然係好，但佢似乎over左。

「我不為錢而活」我簡單回應。

說來奇怪，Tasha成日覺得我係個比佢貪慕虛榮的人，因為我會用Chanel，會化妝，同會target有質素的男人；但真係估唔到，「我不為錢而活」這句話竟然出自我Betty把口，而句句講錢既，竟然係Tasha。

  

「我盤生意係要打低李嘉誠，唔俾佢壟斷香港，做良心企業的先驅；我盤生意會打入大陸，我會成為第二個馬雲；我預見到我好快會同習總見面。」

聽到呢度，我諗你已經certify佢係傻左。我響佢屋企望住佢掃緊地既老公，睇下佢對老婆既偉論有咩反應，結果就係毫無反應。一個都唔知你做緊咩既老公，點樣可以幫到你？就憑你一個人對貢獻社會的熱心？

「我教會有很龐大的network，各行各業的人才都有，是上帝安排給我的，他們都會幫助我。」

我見過她的朋友，都係薯薯地好老實那種人，從來做生意係要夠奸，呢班人，點樣可以幫到你？

Tasha雖然信奉基督教，但有去睇相同算命。依我所知，信上帝的人都不看這些，因為他們相信命運自有上帝安排，一切交給上帝。佢話相士話佢過幾年會好有錢，要車買車，要樓買樓，生活無憂。

其實我無意干涉她的信念，我只是很想問她，既然妳能預知未來，究竟Betty我幾時嫁得出？我的真命天子在何方？可否讓上帝去引領我去搵到這個男人？

定還是，Betty係唔會嫁得出，佢唔想傷我心所以唔講？

而作為我朋友的她，應該知道一個踏入30的女人最大心願係搵個好男人嫁，我講到明現在只係想搵份簡單的工，識個好男人，而佢只係講：「你來幫我手，我俾到好多錢你。」

錢，Betty我要的不是錢。

如果做生意係咁容易，人與生俱來都唔貪心，心甘情願去幫人，咁我地聽日可以返公司反老闆張檯，大叫一聲：

「我唔撈啦！我會成為第二個馬雲！」

然後發達去，升呢做有錢人，擺脫朝九晚六的奴隸生活。

照顧男人的女人

Tasha今天跟我說想搞網上生意，已經諗好唒成盤計劃。

我聽完之後，無錯佢係有唒所有connection，但佢諗得所有野太容易同順利。收線時佢仲加左句，「我是上帝派來的使者，我要搵好多好多錢，然後去幫返呢個社會。」

可能你會話，Betty你個friend係咪傻架？Tasha是非常非常虔誠的基督徒，我從來無當佢係傻的，我亦無低估佢呢句說話認真的程度。

初時佢嫁的時候，我有點擔心她日後的生活，佢老公又唔係叻，又無錢，當然Tasha係唔介意先嫁俾佢。婚後同老爺奶奶住，現在頂著個7個月大的大肚子住間小小的房間，講真有幾多女仔會好似佢咁唔介意，仲貼錢俾埋酒席？到佢而家大肚，再加這番偉論，我先明白到，有一種女人，是負責照顧男人。老公無用，就自己去擔當一家之主的角色。佢老公不知幾求之不得，娶個老婆返來無cost，幫佢生仔，唔使買樓肯同佢阿媽住，仲搵埋錢養家。

Ada話嫁得出的女仔，都係非常遷就個男人，例如同佢阿媽住，老公話點就點。當然另一種係老公有錢又錫到你燶就無這個問題。我消化Ada的「遷就論」，覺得so true，你會發現一些好惡死的女人好怕老公，對住老公完全兩個樣。

我公司個八婆receptionist Gubi串我的時候咀miu miu 黑人憎到無倫，有一日佢老公來接佢放工，嘩！真係從來無見佢咁溫柔小鳥依人過！佢老公好高好靚仔，成個陳司瀚咁。我響度諗，能夠扮溫柔呃到個靚仔老公返來，這樣夠高招了吧？再一次印證港女嫁唔嫁得出，除左根本的性格、外型問題外，同識唔識扮野有直接關係 — 扮乖、扮純、扮善解人意、扮溫柔等等。

可能你會問：乜呢啲有得扮既咩？

我可以好肯定答你，有！我見過太多實例。

到呃到返來，入左宮，奸計得逞，成功將自己嫁出去。好似Gubi咁，佢既正職係上網買LC煲，買牛排、海鮮煮俾老公食，做個幸福師奶仔。本來我Betty係好羨慕，但當我知道佢既溫柔係扮出來，有想作嘔的感覺。

「好心佢啦，咁樣教女，第時個女肯定嫁唔出！」Gubi lunch時在講某男同事是非。

聽落好硬耳，不過又抵得佢真係嫁得出，仲係好靚仔。所以佢從不避嫌叫佢老公來接放工，閃下都好。

有些人惡惡地，係要在辦公室保護自己唔好俾人欺負，但無端生事出言串你，講一些說話令人唔開心，好明顯唔係出於保護自己，係佢純粹唔鍾意我Betty，其實我都唔care所謂喜歡不喜歡我，在辦公室我是打份工拎份糧，我唔諗住來識朋友，只不過講得出咁黑人憎說話的女子，心地好極有限，我Betty最憎虛偽的人。

一般女人係想搵一個可以照顧自己的男人，但若然你能夠放棄這個念頭，的確好容易將自己嫁出去。