悶

Janet將於下年結婚，不打算大搞，只是計劃緊買樓。

「我一點都不excited，無咩感覺」Janet無奈地說。

Janet最近得到一個到英國分公司工作的機會，初時非常興奮。

「嘩，正呀！weekend去巴黎shopping，去brugge食朱古力，仲有呀仲有呀，我好想去冰島，同去芬蘭探聖誕老人！」

Anthony當然是極力反對，都打算結婚了，還去咩英國？

「你份工響香港好地地，我養得起你。我地仲要生小朋友，我已經計劃哂。我地響美國返來，已經係international exposure，你根本就係貪玩！」

過幾日，Janet衡量過所有，除了轉去分公司工作性質要轉之外 （主因啦），Janet不得不向現實低頭：

「我已經30歲，Anthony的確係可以照顧到我下半生的人，我… 唔會放棄佢。」

Janet個人雖然有時好13點傻大姐，但絕對是個聰明的女仔。她對Anthony只有感情，已經無愛情，但Anthony屋企有錢，雖然無時無刻都想飛左佢，但一直都搵唔到一條更好的水魚，霎下眼，一齊已經近8年，名符其實係食之無味棄之可惜。

「我對住佢好悶！」

悶？ 其實single得耐都好悶！

    

Betty這邊廂，踏入三字頭，生活有了頗大的轉變。首先而家好鬼慳家，好多不必要的娛樂都是不必要的消費，可免則免，目前除了瑜珈，facial, massage的package，其他可說是零消費。人大了，除了知道搵食艱難，就是做女人一定要有錢旁身，許仕仁個老婆都奉勸各位女士一定要儲錢，跟老公財政獨立，這個思維不是因為我單身，就算我他日嫁得出，我都會自己儲舊錢。男人，靠唔住！加上，我唔覺得佢奉旨要養我一世。

第二呢，就是對什麼clubbing飲野無哂興趣，就算迎面而來一個帥哥，我都只會覺得好野點會輪到我，係咪有老婆架？定係player想搵食？我Betty 係正經女仔，非誠勿擾。以前細個係無知，覺得自己後生又靚大把人鍾意。Overtime知道現實係殘酷，唔係你靚同人好就一定有人鍾意，要睇埋性格，同運氣，你的朋友圈質素；相反你唔靚個人衰都唔一定無人鍾意。就是因為咁多年來，見到好多這些實際例子，Betty個人已經好化，好多事，真的是命，唔需要強求，最好自己就可以。

由於唔想使無謂錢，Betty真係無咩娛樂，好多都係單獨行事，例如yoga, facial都係個人活動，唔需要約人。再說，好多朋友已經結左婚，已經唔似以前咁多活動，什麼船河，BBQ，踩單車，唱K……

悶，係呀，真係好悶，但又無辦法。Betty其實有一些計劃，不過真係執行到先公布。

單純的人

最近tvb播放由柯佳嬿同邱澤主演的”小資女孩向前衝”，朝朝返工化妝的時候就重播，又覺得幾好睇，所以就上網睇哂成套。偶像劇一貫就是你不用看，也猜到劇情，但你仍然會追看下去。

幾年前認識柯佳嬿就是在雜誌上，因為她的鼻跟Betty一樣高但又有節，細看內容，果然感情不好，她好細個已經結婚然後極速離婚；另一樣她吸引我注意的是她散發一種好獨特的氣質，就像桂綸鎂一樣。我不理她感情事有多糊塗，不過她的氣質和演戲真的很不錯，像沈杏仁的角色，不是每個人都做到那楚楚可憐的效果，例如給楊丞琳演就不成了。再說邱澤，那憂鬱的眼神，不可公開自己身份的委屈，好有感覺。還有他彈結他清唱”微加幸福”真的很好聽。坦白說，本來不愛看偶像劇的Betty，都被他倆的演技吸引住了！就是這麼簡單的故事，但他們令觀眾能夠投入到角色裡。

Betty不愛看偶像劇，是因為我覺得不真實，我不喜歡看完很投入很sweet，但回到現實世界是不一樣的那種感覺。沈杏仁是一個很務實﹑單純的鄉村女孩，憑著自己的努力，得到客戶的賞識。如果你要我形容自己，Betty初出來工作時也是一個很務實﹑單純的傻女孩，但單純這個詞語有很極端的待遇︰秦子奇﹑余承風喜歡沈杏仁的單純，擔屎不偷吃，樂樂憐愛這位朋友說怕她經常吃虧；而現實生活中，Janet說，我這種性格很容易被人欺負，坦白講，我不覺得有人很「欣賞」我的「單純」，只會覺得這個人是「可以欺負的」，有著數他拿走，難做/豬頭骨就留給我。客戶/老闆只會覺得我不夠醒目，但叫做信得過人幾好，而不會特別加以讚賞/打賞。我身邊亦無出現過一個秦子奇不斷在我身邊幫我同「欣賞」我，我亦覺得現實生活中很少單純而受到愛護的人。

久而久之，當我發現自己好人同單純只會被人欺負，我就慢慢學識要保護自己，學懂要走精面，就像鄭凱兒一樣。單純的人又豈能在社會中生存？好似沈杏仁這樣好的人，現實中又有幾多個可以步步高陞？還認識了公司的太子爺？如果你是老闆，你會升又漂亮又能幹的鄭凱兒，還是好老實又傻乎乎的沈杏仁？

單純同蠢其實只差一線，由於單純的人老實又不會走精面，所以只能靠雙倍的努力去在公司裡生存。單純的人是看有否運氣遇到一個懂得欣賞你這個出污泥而不染的個性的老闆，遇到個好老闆，佢會珍惜你同保護你。單純的人也需要好同事去幫他一把，提醒佢同有穫時見佢咁可憐幫一下，這也是看運氣，否則你只會遇到完全相反的同事，搵你笨或俾死貓你食。一般單純之人只會是被人搵著數﹑欺負的對象，想升職加薪更加有排都唔輪到你，因為就算唔加你人工你都唔會出聲，只會默默耕耘。

可能你覺得我偏激，不過我真係覺得一個人運氣好重要，起碼佔一半，你個人好又勤力但無運都無用；但假設你個人衰又懶但有運，做好多事都可以事半功倍。