叫雞

承前2篇blog提及過在電梯跌下幾個避孕套的男子，聰明的你應該估到，無錯，這名男仔唔拍拖，但有叫雞的習慣。

叫雞這個名詞，自小有的概念是，猥瑣核突的男人無女仔鍾意，又好有需要，所以去叫雞。但今時今日資訊發達的年代，叫雞唔需要去夜總會，也不需要去砵蘭街，上網click個制就可以。剛被警方搗破的大人網，竟然有9萬幾個member。今日我要重點分享是，其實有好多靚仔又有事業的男人，都有去叫雞的習慣。

靚仔有事業但無女朋友的人，除非是gay，否則是叫雞的高危人士。這些實質例子，由Janet男朋友Anthony講就最有說服力，因為他是美資銀行的banker，工作壓力好大，同行的男生不是飲酒﹑做gym打tennis，就是去叫雞去減壓。有好多男仔就是不喜歡拍拖受束縛，溝女又勞心勞力，叫雞真係好方便，又無手尾跟。

Anthony說︰「去club溝靚女都要時間﹑耐性同錢，但叫雞不單止省卻溝女的時間，還可以揀身材﹑高度﹑甚至係國籍 。當然，靚女係必須。club識的女仔都係污糟，咁易同得人上床，都唔會得一個sex partner。」

「我有些鬼仔同事甚至會是lunch time去叫雞，沖埋個涼返來繼續做野。」

基於我同Janet的友好關係，Anthony咩都會講，在旁的Janet只會哈哈大笑。Janet好肯定Anthony不會去叫雞，「他怕死，才不會！哈哈哈！」

一個不去嫖的男人，是怕死 (染性病) 多過是覺得對不起自己老婆/女朋友。

One-man Band的婚禮

Tasha上月大婚，有太多感想。作為她10幾年的好朋友，她結婚，我衷心的替她高興，但婚禮中所有的人同事，對我來說，是一場惡夢。

做姊妹辛苦係人都知，超早起身，到好夜先走得，真係仲辛苦過公司搞event。做姊妹咁辛苦不為錢，為的就是一份深厚的友情，無論幾辛苦，幾唔認同咁做，都會硬著頭皮去做，希望婚禮順利﹑開心。

首先姊妹團8個有5個是公主，兄弟更是前所未見的「不是男人」，除了有8成結左婚，還個個都好無風度，一係就發緊夢唔知自己做乜，一係就掛住自己圍埋打牌﹑吹水﹑食煙。晨早揸架車來已經仁至義盡兼最大的貢獻，可是的士司機都仲好服務過佢！Betty心諗，靚仔single都話忍你，結哂婚兼唔靚仔仲要咁唔合作，不是看Tasha份上我中左呢班戇男好耐。

歸根究底，Tasha老公是什麼樣的質素，就有什麼樣的朋友。

Tasha老公除左個樣叫做幾好之外，我真係諗唔到還有什麼優點。Tasha婚後跟奶奶同住，奶奶還要拎返自己朋友那幾圍的人情。我見Tasha咁緊張咁委屈，相信Tasha俾好大部份既酒席錢，如果係老公俾使乜咁緊張，佢阿媽拎返個仔d錢咋嘛。

Tasha成晚換左4套衫，所以整個婚禮就是不斷換衫化妝同set頭，出面地震都唔知；而那個老公呢，就行行企企，自己2朵襟花都整唔見，爭d連老婆個花球都整唔見埋，影相個list問佢想點排，佢竟然話唔知。喂，阿生，個婚禮是你的，我們姊妹是幫手，自己的事也不緊張，30幾歲人，what’s going on with you?

Tasha超短notice叫我做MC，叫我扮靚D等多D男士見到我。首先，那班「優質」兄弟真係唔該哂，第二其實我不是一個喜歡出風頭的人，我是會怕醜而且我不是真的那麼識得講野那種人，但Tasha諗住我會鍾意做，同「俾機會」我蒲下頭。說真那句，係諗住介紹男仔俾我，應該出來帶我周圍social，但她整晚就是匿埋間房度set頭化妝，諗住隊我上台做MC就叫做幫左我，唉，真係吹賬！

我那個已婚肥仔partner，更加令我欲哭無淚，認叻唔理人，我忍唔住串佢，「咁你自己上台一個人講，唔好同我夾，你亦都不需要一個partner」。我真係忍左佢好耐，但婚禮的尾聲我結果都是鬧爆他了，當場黑面。好憎一個人還要在台上扮有默契搞氣氛而且笑容滿臉，Betty真係成世女都未試過咁委屈同難受。

一直只在房化妝的Tasha當然對場外所有事情都亳不知情，但對於我在婚禮後幾天都很沉默感到很不尋常，因為一般我會好多野講，但我對於她的婚禮真的無話可說，說她老公不是，她不愛聽，無謂說也無資格說。見到她整個婚禮都係自己一個人搞，given that 佢老公唔係忙要周圍飛而參與唔到，純粹係懶同慣性咩都有Tasha幫佢做，改個seating plan都話自己唔識excel，我就覺得好無奈，同再一次否定為結婚而結婚。

雖然有時Betty會擔心自己嫁唔出，但看到Tasha嫁個咁既人，真係唔嫁好過嫁。

女仔唔覆message

Betty翻看本blog的stats，發現有人搜尋「女仔唔覆message」而找到我寫的 “不必回覆的短訊” 。這篇blog也是最多人看的一篇，我覺得好有趣，想在此再深入一點分享。

其實我想說，唔覆message呢家o野不分男女，男仔都好鍾意唔覆message，而共通點是簡單到不可再簡單，就是他/她對你/妳根本沒興趣。OK，如果你仍死唔信，那的確有小部份人 (係真係「小」部份) 善忘唔記得覆，或者真係好「忙」唔得閒覆，無論係真「忘」定假「忙」，你都係無行，所以別浪費時間了，更加唔需要問點解，也不用研究他/她在想什麼。試問你會研究黃夏蕙/八兩金有否回你message嗎？你有沒有想過可能你就是他/她心目中的夏蕙姨/八哥。

假設女仔actually對你有意，無論她點扮o野，頂多吊你2-3日，目的係想你掛住佢，但如果成個禮拜無消息，就唔係吊你啦，係對你無興趣。個人認為男仔想的東西更簡單直接，唔覆就係無興趣，所以今日的Betty已經無興趣玩心理戰，追我就追，唔追罷就。開戰的也不是好男人。

朋友Ada參加了1對1的Speed Dating，埋怨第1個不是太覆她message，第2個講左聲要去旅行，就消失了差不多一個月，到現在也音訊全無。

Betty第一直覺︰「會不會是媒？」

老實講句，在香港，一個有眼耳口鼻，有份工，個樣唔係太衰又唔係太矮，點會無女朋友。

Ada︰「也有可能！不過我覺得他們有事業樣又唔係衰，要搵speed dating，肯定性格有問題。即是話，唔可以以常理去分析他們的行為。」

雖然聽落Ada係想包庇這2位男士，覺得自己還有機，而不是對方無興趣。但其實又說得對，香港有些男生總是性格怪怪的。

Janet說︰「香港單身女仔絕大部份都係正正常常，甚至有些是美女；但香港單身男仔絕大部份都係性格有問題。」

Janet成日想在他男朋友的朋友堆中幫我找一個男朋友，他男朋友做banker，而且屋企有錢，身邊的朋友都有相似的背景。但次次想介紹俾我時，都被她男友ban了。

「他說都不適合你。而且不想有什麼問題妳會怨我們一輩子呢！」

Janet就是這麼直接，這也是我很愛她的一個原因，她就是有好東西會留給我，會去了解我的一個朋友。他男朋友也是一個很好的男生，心思細密的他也好清楚我是一個什麼樣的女生，他要100%肯定是個好男生，才會放心介紹給我，而當他不肯定，介紹給我也沒著數，作為一個計數好叻的banker，先不會做咁蠢既事。

Janet男友ban的那個男生，雖然家裡好有錢，在美國讀建築系MBA，但有一天在上班的電梯內，不小心將數個避孕套跌在地上，而他當時根本沒有女朋友。

2015 New Year Resolutions

又好耐無寫blog啦，原因是因為覺得沒什麼好寫，人化了，沒什麼不滿了，也沒什麼想發洩。今天臨睡前都堅持要寫，是因為我要檢討上一年自己寫的 2014 New Year’s Resolutions 究竟實現了幾多︰

1. 搵多點錢，儲多點錢，希望今年儲到10萬蚊
成果︰ 儲到有突添啦
2015目標︰希望儲到25 20萬 (還是不要太大口)

2. 識到一個好鍚我﹑好明白我的男朋友
成果︰ 仲未有，唉
2015目標︰繼續努力

3. 同爸爸媽媽去多次旅行，希望是遠行
成果︰ 同媽媽去左次美國了
2015目標︰今年帶埋爸爸去 (先去一次台灣先)

4. Stay healthy, 繼續去多點瑜伽，一星期兩次
成果︰ 又係超額完成，因為現在轉工了，早收工，一般我一星期去2-3次
2015目標︰希望做到多一點高難度動作，現在我的技術好停滯不前，話我唔識瑜珈又唔係，但好多有難度的動作我還未做到，努力在練bakasana

5. 不用再OT得太厲害，多點時間休息及瑜伽﹑陪屋企人
成果︰每個星期日都一齊飲茶，我俾錢添
2015目標︰我覺得這一項今年做得很不錯

6. 收斂自己的脾氣，對爸爸溫柔一點 (我們經常性嗌小交)
成果︰ 已經儘量收斂，但他實在太煩，而且有時無理取鬧，任務失敗
2015目標︰這一項內心已經完全收到，只需時間和耐性去協調

7. 在街上跟四目交投的陌生人微笑
成果︰ 一時時啦… 我都認為自己不知為何無故燥底，唔係幾想同陌生人笑
2015目標︰再試下

8. 關心多一點朋友，尤其是認定了的好朋友
成果︰ Tasha剛結婚，我好落力也為她高興，周圍去撲她喜歡的公仔，連個事頭婆都話我對我個朋友好好，出錢出力。Janet is always my sweetheart，要keep住！
2015目標︰到我呢個年紀，再沒機會識好朋友，其實我覺得我個人係好左架，都有朋友咁讚過我，說我沒以前自私任性不理人感受，我覺得任務算是完成

9. 慎言
成果︰ 都算做得幾好，工作上唔關我事的事基本我是不太理，也不插咀，做自己本份就是了。朋友嘛，我以前會講人「如果我是她我不會這樣做，這樣做浪費錢和時間…」「佢男朋友染哂金毛…」其實我認我Betty以前係幾鍾意講人d野，說不上係是非，但會將自己的感覺講出來。其實人家的事與我何干？我現在是不會說的了，也懂得分輕重。
2015目標︰我覺得個人係化左，唔再對人﹑對個社會有抱怨，反正就算有多不滿意，也改變不到其他人﹑這個社會 (我意思係憑我一個Betty改變不了香港將來有無真普選)。由於Betty還未嫁得出，所以未有多餘的心思氣力去改變香港，2015年我還是先理好自己。

10. 減到105磅 (現在體重仍然徘徊在110-114磅)
成果︰ 徹底失敗，我想我現在是115-118。有人跟我說做瑜珈會愈做愈重，可能因為有肌肉。我做按摩希望按瘦點對腳，不過暫時效果不太明顯
2015目標︰繼續努力

諗到2015 Resolution會再更新。HAPPY NEW YEAR EVERYONE!

*1月11日更新︰想了一星期，我覺得對自己的要求已大致完成，唯獨欠缺一個自己的家庭同儲多一點錢，所以2015目標只有6項，我會努力的啦！