Attitude

臨近情人節，發現Lovestruck的post就多人睇返。如果你問我，我真誠地勸大家不用浪費金錢，online dating好多都唔使錢，做乜要俾錢去識埋D唔知咩人，o徒鬼氣！

人真的是種世上最犯賤的動物，因為要錢，要付出，就覺得係正野。其實online dating從來是不可以認真的遊戲，玩的時候，抱住的心態是無聊搵人傾下計，岩既就約出來了解下，就是這樣。千萬不要有這樣心態以外的期望，通常你無期望的時候，往往都有驚喜。亦因為你無期望，你對對方的態度都會不同。

我在英國約會過的男人，我數過，有差不多30個！約會的意思是出來食飯，見過面的。我全部都是上網識的，所以我對點樣吸引男人約我出來非常瞭如指掌，但「約出來」同「可以發展」完全是兩回事，亦好睇對方是什麼人﹑什麼心態約你出來。而鬼佬，10個有9個都是想上床，我也承認因為我filter得不夠嚴謹，所以我先見過咁多個。如果我認真去filter，其實真心想做朋友的，真係5隻手指都嫌多。但對於我來講，I DON’T CARE，我一心是想見識﹑想玩。當然現在回到香港，我無興趣再浪費時間去跟一個只係想同我上床的男人去街。

要玩，都玩過啦。

講真，說到尾，點都是女仔蝕底架！

我喜歡跟不同男生約會，因為他們會帶我去一些平時我無機會去的地方。我說我很不習慣倫敦的冬天，他就帶我去有火爐的地方，還一早霸定位。而倫敦有火爐的餐廳實在不多，所以我都好impressed!

過去的戀愛經驗，我對男人了解到一樣東西，而這是powerful到不分國籍的︰

千祈不要對男人太好，而如何為之「不太好」，就是到一個位你覺得自己咁講﹑咁做「好似好衰」– 咁就岩喇！Then you are on the right track!

例如唔覆下佢message﹑佢遲到﹑做錯事毫不留情地鬧爆佢 (當然有點技巧，不是潑婦那種鬧，單單打打下佢串下佢)，要表明立場你嬲，千祈不要扮大方，簡單點來講︰

女人要有ATTITUDE

我們喜歡一個男生，害怕失去他，好多時候都會扮小女人，原諒他的inappropriate behaviours，好簡單如遲到/ 失約/ 臨時改時間，你一定要表明立場你唔係「完全無所謂」，只係「接受他的理由並不能再有下一次」。即係不是我們女仔小氣，是你不可以縱容他，讓他不尊重你。

我試過有條友，我係好鍾意佢，好想have fun together (你懂的，嘿~)，有一次他約我，到當天下午3點幾先send個爛鬼message來︰

“Hey are we still meeting up tonight?”

我當場即刻收佢皮︰“我唔去喇，你食自己啦！”

他萬萬想不到我會say no，結果之後除左message密左好多，再約我仲book好哂餐廳 & uber，好準時響tube station等我。

你不用理他是否出自真心，總之佢肯做，這個是非常重要的。一個男人是敷衍你，定有擺efforts去做一樣事去討好你，你一定感覺到的。如果佢吊兒郎當你仲話無所謂唔緊要，那他只會覺得下次一樣可以咁放你飛機，同覺得你無挑戰性﹑無個性﹑無attitude，TOO EASY~

要一個男人肯為你做一些東西，是不容易的。

港男那種「兵仔」文化除外！我識過咁多國家的男仔，真的無人咁白痴做兵。

鬼仔，真的不會。

英國的懶人社會

英國經濟其實好差，尤其Brexit宣佈後，他們的內部政局非常不穩，因為一半贊成，一半極力反對，原因是對英國短期性的經濟有很大的負面影響。英國人，懶到無人有，最慘係性格又自大，不會檢討自己，無視很多經濟及政治的計時炸彈。單單是恐襲，倫敦已經是IS的頭三要襲擊的城市，我去之前都唔覺英國人咁乞人憎，去完真係覺得呢班人好抵炸。

英國的治安也不好，得個死人機場係咁check你的行李 — 我真係好憎由倫敦出發搭飛機，每個機場都鬼死咁遠不在話下，LCY要人將所有liquid/ paste塞入一個鬼死咁細的膠袋仔度，仲有個zip要zip到100%先俾你過，否則要你掉走一舊。我總是覺得英國人做事很喜歡將重點放在錯的地方，與其你咁有原則限人帶得幾支試用裝驚人炸飛機，倒不如花多一點時間去整頓市中心的治安，come on! 成街都係賊，旅遊區好多小偷 — 沒錯！一般人會覺得倫敦是一個很安全的城市，這其實是英國政府自欺欺人的技倆，成日包裝自己又叻又靚，等人無防範之心，所以我都俾人當街搶了電話！巴黎﹑羅馬﹑巴塞隆納多小偷係人都知，政府都認，呼籲遊客要小心，但英國？只會話︰「無！無D咁既事！我地倫敦好安全架！」

安全？連環恐襲已經知有幾安全。重點是，街上警察其實不多，而且非常﹑超級的懶，報案都想hea走你︰

「小姐，你個電話我唔覺得有機會搵得返，而且要落1-2小時口供，你決定要報？你報我要開file」

我心諗，阿生，我唔報案企響度做乜野呀？而你又響度做乜野？警局請你返來坐？所謂2小時的口供，只是因為他們做事太慢 (+掛住傾計)，香港警察20-30分鐘一定KO到你啦。報失咋喎，有幾難呀？如果有更大事情發生，你真係咪使旨意倫敦警察會好有效率幫到你。

而且有不少警察，個肚腩仲大過我老豆，同埋好鍾意傾計！我真係唔明點解英國人咁鍾意講野，講埋D無聊野，我的同事都好鍾意吹水，you know why? 因為傾計時間過得快D，又借D二做少D野，所有英國人都一樣有這樣的個性。但警察你在on duty，你掛住傾計人地側邊放個炸彈你都唔知啦！I mean他們喜歡吹水的程度是作為一個行人你都會覺得他不是在工作的。

火車呢，經常性delay，耐則15-20分鐘，甚至成班火車cancelled! 地鐵看你那條線，我住district line都成鬼日delay，走左班車要等7-10分鐘。一條電梯要整3日，而那條電梯是轉車必經之路，無樓梯可以行的！害我3日兜條大路轉2次車，心中無限個x@##!@&。我們香港，3小時整好都嫌慢，俾人DIU到天花板呢！巴士反而好準時，但龜速。

Embed from Getty Images

英國也留不住人才，因為它的稅收他媽的高，年薪超過4.3萬英鎊就要交40%的稅款！比起香港約16%來說，真是天壤之別~ 而且4.3萬英鎊也只是45萬港元，即月薪4萬已經被政府立入「高收入人仕」，再加上倫敦超高的生活開支，真是WHAT THE HELL! 香港大把人搵緊4,5萬，也只是個小中產，莫遑論是「高收入人仕」了。

有不少大型的外資銀行/ 企業歐洲總部已經部署撤離倫敦，Goldman Sachs正安排掉走幾百個員工到Paris/ Frankfurt，連帶他們的families，將有幾千高質素﹑有學識的人遷出倫敦。而曾經想過HQ搬來香港的HSBC，也再作出考慮搬離倫敦。事實上，很多叻的英國人，根本上不用留在倫敦俾重稅，他們會來香港，現在很多去了上海同北京，人工更高，但俾少好多稅，living standard is tripled higher~

叻人走哂，咁蠢人呢？

高貴的英國人是不會做辛苦工，現在所有餐廳﹑執垃圾﹑清潔等工作，都是倚賴一群無學歷﹑無錢的EU朋友，而Brexit後，他們想留也不能留，最後這些厭惡性工作，只能俾高一倍人工俾返英國人做。

Brexit long run而言，對英國或者是好事，始終整個歐洲的經濟，現階段是非常倚賴較「文明」的德國和英國。歐洲各國的政局不穩，絕對會連累英國in some ways。太詳細的政治﹑經濟分析我不懂，只是依我住了一年，我不覺得英國是一個可以長遠發展的地方。

一個國家有問題不要緊，但不知道自己有問題，甚至自大得不覺得自己有問題，一意孤行﹑一成不變就是一個很大的問題。這也是英國經濟持續下滑的主因。

望著手中的英鎊，真是欲哭無淚。辛苦賺回來的錢變了toilet paper，換回港紙又蝕，唔換又擺響度獻世。

還是港紙好。

理想老闆

經過一年多的瘋狂歷險，Betty又進入要搵工的搏鬥。

出走一年好似好好玩，但我犧牲的東西，和在英國受過的苦，所有人都不會明白。我不會周街同人講，況且都不知道如何說好。

真正的委屈，是說不出來的。

單單是要再搵工，已經是有苦自己知。

所以請不要再說羨慕我，你都可以，只係你無膽咁做，又或者生活條件唔容許你咁做。但我咁樣做唔代表我係衣食無憂可以去「任性」，而係我願意犧牲去達成自己的夢想/ 想做的事。請讚揚我的勇敢，而不是覺得我去風流快活。

做左咁多年人，覺得份份工都做得唔係幾開心，積積埋埋先有出走的念頭。現在國就出過了，體會到太多太多野，如今回來，更加知道自己想要什麼，無論是事業和愛情。

年尾難搵工非常正常，瀏覽求職網站，確是無乜邊份睇得岩，再唔係send去又無回應。我告訴自己，今次我一定要搵一份我非常喜歡的工作環境，其實做咩都不是主要，環境同同事先最緊要！試想想，我們每天花一半時間上班，對住老世﹑對住班同事﹑坐住個位﹑行走公司附近的路，如果不是你喜歡的環境，那只會是行屍走肉，渡日如年。

Embed from Getty Images

我嚴選以下條件︰

1. 老闆一定要係男人
2. 老闆一定要係鬼佬，總之唔要香港/ 大陸人
3. 公司一定要在中西區
4. 一定要係大公司
5. 一定要係外國公司

我發覺我不適合做細公司，因為Betty不是個好識亦好懶打交道的人，基本上我不是很喜歡說話的人，尤其講埋些八婆野﹑講人是非我就最憎。但細公司你好難避免不去「埋堆」，不想參與又要扮下野應酬下；不想知又點都會聽到D…… 大公司唔同，公司大可以走來走去，識下不同department/ team既同事，可以吹閒水 — 我Betty最鍾意呢D君子之交淡如水的關係！見到靚仔又可以眉目傳情下，pantry傾下計，幾sweet丫！大公司一般福利又比較好，總之人與人之間無咁親密，少好多是非同和煩惱！所以今次我要stick to it. 外國公司文化又more diversed，有來自不同國家的同事，返工都無咁悶啦！

而跟男人老闆好D係常識，男人是對女人比較好同客氣，如果找到個鬼佬仲perfect，3點去做gym，不夠5點夠就要回家湊仔family time，每逢長假期又會飛回家成個月，又不會對人太harsh，我就是非常喜歡跟鬼佬！最好結左婚的有家庭觀念，做到真正的work life balance.

好久不見

我Betty終於完成一年多的working holiday回到香港了！原來已將近一年沒有更博，我連blog & email 的login都忘了！

闊別一年，不知道大家過得怎樣？我呢…… 太多太多的經歷，也不知從何說起。出走一年需要相當大的勇氣，放棄所有，花了不少積蓄，但我是想了很久的決定，所以我不會後悔，也對任何負面事情有充足的心理準備。所以天塌下來的時候，我已訓練好強健的雙臂將天推回天上。驀然回首，原來也不算是什麼。

這一年，我去了很多很多的國家，丹麥﹑荷蘭、法國﹑瑞士﹑葡萄牙﹑德國﹑捷克﹑克羅地亞﹑匈牙利和意大利！計埋英國就是整整11個啊！遊記隨後補上吧，好玩的好吃的，我也可以分享一二。旅行上我花的錢也不多，而我Betty也不致於是窮遊，只要悉心計劃一下，不要太多要求，也可以慳錢又玩得開心。

而為什麼不更博呢？因為真的沒時間，也沒心情。唯一一篇在英國打的blog，是我剛搬了新屋，完成一份temp job比較空閒的時候。我每天不是在返工，就是在搵工，然後是擔心一下生活，一年內搬了3次屋，心力交瘁，搵屋睇屋都好辛苦架，然後要夾新的flatmates，其實每一個事情都真的要花心力去做。當然我還花了大量時間識男仔同拍拖，哈哈！我出發前告訴自己，我一定拿最多的戀愛經驗回來才不枉此行，識盡香港識不到的鬼仔。

我從來沒有國籍的preference，我一直覺得香港有很好條件的男生，只是我識唔到。久而久之，我已經沒有對「條件好的男人」有任何幻想。去了英國，我習慣了外國人的率直，不用計算，他們很簡單，識你只有2個制︰

1. 想上床
2. 想結婚

外國男仔好實際，與其說他呃你上床，倒不如說他從一開始已很明顯地以各種行為和言語告訴你他不打算認真。只是大家成年人，不會講到明咁肉酸，同埋講得太白令整件事唔好玩。鬼仔要什麼？ FUN丫嘛！你太正經佢都費事麻煩，亦都唔想你玩得唔開心。做女仔的，要醒目，同不要被他外表和基本良好印象蒙蔽。只要你一表露無意有不負責任的情慾關係，他很快就收皮，不會氹也不會浪費任何時間。你覺得他賤格，但其實這是好的 – 真的是好事！我不是想冒犯香港男仔，而的確港男會偏向講大話﹑氹同死纏爛打，直到呃到你隻豬為止就自動消失，這些才是真正的賤。利申︰不是惡意指責每個港男都一樣~ 但以我同過外國 & 香港男仔相處，這是我的感受和見解。

我也識過想結婚的 (唔一定同我)。Come on我Betty來英國係玩，無諗過認真，莫講係結婚！而最慘係咩呢？是他對你的一言一語﹑一舉一動都非常在意，這令我連做朋友都感到壓力好大。這些男人佔有慾非常強，而且非常小氣。還記得我臨離開倫敦前2星期，告知他我要回香港了，不會再回來，相約他最後見面，也希望有一天香港/ 美國/ 倫敦再見 (他是美籍韓國人)。我想他一開始是晴天霹靂，然後覺得我呃佢，再然後係好嬲我。最後他沒回覆我短訊，我們以後都不會再見了。男人是從來不會想單純地同一個女仔做朋友，但我覺得我們從來只是普通朋友，如果他有一點點喜歡我，不想臨走前再見見我嗎？我也很怕太認真的男人 – 像他一樣。你可以說我很矛盾，不想要playboys，但又怕太認真的人。或者這樣說吧，我人比較慢熱。

說穿了，他不是我杯茶。

有好多35+男人想結婚，只是想找個伴，找個女人生仔，建立「自己的家庭」。他根本不愛任何人，他可以skip所有拍拖應有的甜蜜細節，因為他要的不是情人，而是確實一個他可以操控和私有化的人，他最愛的是自己。這個韓男就exactly是這樣。

男人同女人不同之處，就是男人識女人是好有目的，咩目的都好，例如上床﹑搵人陪，甚至是搵你幫他手做野等等；但女人可以真的沒有任何目的去識一個男人，我們可以真的純粹是識個朋友，當然first date唔請食飯既會立刻列入黑名單，不是貪你餐飯，是睇到個男仔的人格和誠意。

上篇說到的男朋友，我們的確拍了5個月拖，也是令我非常傷心的一段經歷。我對他從來不是愛情上的「認真」，而是我確實相信這個人。我跟他的相遇，是個黑暗的巧合。我去倫敦不夠2個月已被電單車黨當街搶了電話，手還被抓得見血。他一天10個電話打來虛寒問暖，當時我無乜朋友，又不敢告訴香港的父母，極度無助！他幫我搬了2次屋，每次都同landlord鬧大交，因為每次我都被不同原因屈扣100-300鎊deposit。我那時候以為他是真心的幫我，至少…… 他真的幫過我。Tasha說，我人善良得受人少少恩惠都好像會過意不去十世，這也是為何我是毫無保留地信任他，因為他鄉有人「無條件」的幫你是非常感動的事 (當然最後絕對不是無條件)。無助的時候都想有人擁抱，人都有脆弱的時候~ 倫敦的冬天真的很冷！

最難受的是整個過程被操控的折磨，對於初到倫敦的我，信任被利用是很大的挫擊，也深深體會到英國人人前扮紳士，人後那種虛偽陰險的恐怖。

有些好人，是成人之美，真心協助你適應生活；壞人是乘人之危，利用你的弱點去拿著數。後來我來倫敦久了，也在工作上認識到新朋友，不再需要依賴他，才有離開他的勇氣。那決定真的是剎那間，我曾經拿回所有東西準備離開他，然後又心軟回到他身邊。最後我離開時，還有一些衣物和護膚品在他家裡，Jessica 堅決叫我不要回去，那些東西就當捐出去算了。

我感謝在我無助的時候，我的閨蜜不離不棄的跨越時差陪我傾計，我哭紅了眼睛，連續幾天睡不著，怕他來我家找我。

Some people come into your life as lessons

我不是想像中的蠢，只是我人太善良。

而我深信壞人是有報應的。

知道我在英國學到最多的什麼嗎？就是不要相信任何人！是真的！而且明白這個世上真的沒多少個好人，人都是自私的，遇到好人是bonus，遇到壞人其實是正常的。所以經常要保持防人之心不可無的心，尤其一些無事獻殷勤的人，確是非奸即盜。也別相信來得很快的「真愛」，儘管一開始可以是好甜蜜，但認識一個人是需要時間的，一見鍾情及光速的感情其實很不真實，也太韓劇情節了。

而錯了，不要緊，只要不再犯錯就可以。

這個人令我迅速的成長，下次要帶眼識人，不要再容易付出。

亦已永久blacklisted英國人。