終於有時間坐低打blog，到步後都忙於搵工，之後返工，由於都是短期工作，所以最近我也是在忙搵工，現在搵到份一星期返3天的，我基本上都還在找，希望填滿一星期，因為倫敦的生活費一點也不輕，加上現在自己租屋住，天天都是錢，交通費是最貴的，基本上除非可以行返工，否則一天來回最少都40幾蚊港紙，而我搬左去Zone 3，1日車資要70蚊港紙!
由於太stressed了，日日不是搵工就返工，最近收到讀者留言，令我的起心肝休息一天打blog，您們的支持是我繼續寫blog的動力呢！
來了英國已經4.5個月了，發生的事實在太多太多，苦是多於甜的，但我來之前已有這個心理準備。有見於我的blog主力講男女關係，今天就讓我談一下英國的男人。
在倫敦，真係好易識男人，我現在在手的，都有4個，3個英國人，1個德國人。i mean即係你call佢，佢一定會出來的，或者有需要可以借宿一宵，簡單來說係幫到手的人，別說Betty現實，一個女仔在他鄉有人幫好重要，而你識的人，唔一定個個有求必應，所以能夠做到這種關係，Betty也下過苦功，若即若離，間唔中俾下甜頭，先吊得住佢地。如果我再識，我陸續都可以有，但4個已經好多喇，真的應付不了。而事實上，其中一個，已經成為Betty的男朋友。
其實我考慮左好耐，因為我不想為了一棵樹放棄一個森林，我來英國本來就是來玩﹑來探索，無諗過要認真。雖然我唔知我同佢可以有幾認真，不過我只能說我們的相識是緣份，他在我最需要人在身邊的時候出現，為我解決所有疑難。他比Betty大10年，處事非常成熟，但有時也有很小朋友的一面。初開始相處，基於文化不同，我們之間都有好多誤會。
英國人，非常口不對心，他跟你說的話，最好減一半，不要信十足，這是他們的個性，我已經驗證了，我男朋友﹑同事﹑朋友，個個都係咁的，聽上耳好舒服，但他們只是基於禮貌講反話，唔希望人地覺得佢唔nice/gentleman，聽得最多就係no problem, its alright, not at all，但建議大家小心自己言行，用自己腦袋分析，唔好佢講its alright就以為真係alright，簡單來講，醒少少，小心說話，因為無人會同情你是外國人，反而你做得不夠好，人地會排斥你。尤其我們是Chinese，唔多人識分香港人定大陸人，歧視，英國是有的，我自己來講，係衣著﹑言談舉止都是有教養的香港人，咁人地就會尊重返你，當然我都俾人蝦過架，英國有部份都幾衰，有不少都好arrogant，這是基於歷史以來，英國都是勝利者，是個強大的國家，所以佢地都覺得自己好叻。
好似Jude Law咁靚仔的，在倫敦要識都唔難，當然唔好諗住可以認真，但就算開心一晚都會係個美好回憶
識男仔來講，我從來唔覺得自己Chinese跟其他人有什麼不同，我都係做返我自己。我都有問我4個男人 (哈哈)鍾意我d咩，佢地都話鍾意我的性格，不造作﹑幽默﹑聰明，最後當然我Betty靚女啦，嘩哈哈，男人係visual creatures，外表不是因素都是騙人的，但我想說，他們無提過跟我的國籍有關，而當然他們不抗拒Chinese先同我交往，但也不是因為我是Chinese而吸引到佢地。
如我caption所講，開心一晚都是個美好回憶，與其說我Betty學壞左，應該說是諗通左。人一世物一世，大家成年人，最緊要知道自己做緊乜。就算未ready拍拖的男人，都不一定是壞男人，我的底線是他一定要是個好人，要傾到計有connection，有一個甚至幫我改CV﹑幫我搵工~ 呢d就證明我們的關係不只建基於情慾。我唔識點講，要自己真實體會，我覺得香港就係受到好多呢方面的束縛。而坦白講，香港男人太鍾意講大話，呢度的男人唔會呃你，一係yes一係no，好來好去。
在香港，30歲的男人好多結哂婚，但倫敦，大把30幾40歲的男人是單身的。無人會以自己單身為恥，大家都enjoy the time。香港最大的社會問題，就係標籤左你30歲都未拍拖結婚好有問題，而在倫敦，單身不是一種壓力，無人將這個身份掛在嘴邊。而且，倫敦有一半都是外國人，大家都忙於為工作打拼，再加上外國人酷愛自由，所以呢度要識男仔真係好易，關鍵是不要太上心和認真。我自己來講，因為知道自己好大機會要走，Brixit後要拎工作簽證是好難的，所以我唔敢對感情有太大期望，亦唔想傷害到對方。呢一刻，我只係enjoy跟他一起的時間，我也對他很坦白，最緊要大家心態is on the same page，唔想辜負人同浪費大家時間。就算最後大家要分開，都明白曾經一齊過是美好的回憶，呢方面我地2個已經有共識。
至於我那個臨飛前的男朋友，其實是結左婚的，雖然佢無承認我也沒有證據，但Betty不是傻的，逢weekend唔見人，夜晚一定要返屋企食飯報到的，都是很大機會有家室的人。有一次佢話同屋企人入camp玩，足足3日唔見人，初時諒解佢同屋企人太過開心唔記得左我，後來醒覺佢同老婆一齊，又要湊住2個小朋友，唔會咁大自由度覆女仔message。另外，各位姊妹可以留意，話係自己姪仔姪女的，都要小心，好大機會其實係佢自己的小朋友。我呢個就係啦，個仔同佢似樣到呢…… 當時大家只係話外甥多似舅。最後，就係佢從來不帶過我返屋企，最後我地拗大交，都係因為我堅持要上佢屋企而最後佢帶左我去酒店。你睇呢個故事可能覺得荒謬，我Betty咁冰雪聰明都竟然墜入咁既騙局？我只可以講，有時感情真係鬼蓋眼，當你想展開一段感情，你會想說服自己去相信呢個男人，而最後太多值得懷疑的事堆在一起，你就會知道對方係呃你。如果你問我，後唔後悔？唔後悔，因為佢令我響倫敦更加小心識男人。不過，我都想同各位姊妹講︰
相信自己的直覺！
如果你覺得有懷疑同問題，同自己身邊的好朋友講，大家女仔可以分析件事，然後慢慢搵證據去證明自己的猜測，搵機會跣條友一獲！
一個女人的智慧，就是不要衝動，同大吵大鬧，所有事都要低調進行，先不會打草驚蛇。男人是與生俱來非常擅辯同講大話的生物，唔好衝動質問佢，拎哂證據先去媽叉佢同一腳飛走佢。在於我那位PK男友，佢係上市公司CFO，非常聰明，而且我相信我不是第一個受害者，所以佢玩得好小心，最後我掠唔到佢d咩，但我係臨門飛佢一獲，我到而家都覺得好暢快！因為佢無諗過我一路咁平靜，而最後被飛的是他。
英國的點滴遲下再分享吧！
be.betty 