無謂的年齡恐懼

很多謝較早前一位網友給我分享了一篇由一位’dating coach’所寫的文章。有些points我是認同的，例如︰

男仔怕失敗﹑send句hi來其實你想我點答你？無錯，我也只能回句hi。其實我唔係好明這些男仔的心態，最近都有個男人add我，你add我又話想同我做朋友 (omg 我又諗起表姐夫事件，實在太好笑！:D) 但又無話題同我講，對答很短，無乜問句，搞到我唔知點覆，真係差不多只係講“食左飯未?”、“今日天氣真係好好呀！”話佢怕醜又唔係，對我無興趣嗎？但計都無乜傾喎，也無問我拎更多相 (當然有profile pic) — 咁你add我做乜？(黃慘盈妙咀樣)

上網識港男，真係好奇怪，已經不是第一次。佢add我係咪叫「大膽」同「主動」，咁佢唔同我講野係咪叫「怕醜」同「被動」？

過多幾日佢再唔出聲，我就會delete佢。

但另一樣野，是我十分不認同的，就是這些speed dating公司，不斷灌輸女仔︰

「妳唔好再揀，過多2年，妳俾錢我要我幫妳搵老公，我都幫唔到妳，妳到時30幾40歲人老珠黃，無男人要妳架喇！」

「男人只係鍾意24-5歲的青春少艾，妳30幾歲，無資格揀，有人肯要妳都螺飯應啦！」

各位姊妹，DON’T PANIC!!! 首先，妳要知道這些公司係靠介紹對象賺錢，佢會講到個市有幾差，有幾難自己識男仔，令妳覺得自己需要他們的專業協助。

第二，no offence，這些所謂「人生教練」，講野都係食花生，我唔係話佢講既野完全唔岩，我都唔否認真係有些不設實際的客人要求不符合他們自我條件的對象。坦白講，那些人，都是未拍過拖或單身好久，個人騎騎哩哩，覺得俾左錢，speed dating公司就是萬能，幫佢搵到個陳瀅﹑王敏德。

第三，男人的確七老八十都鍾意後生女，但每個人都會變老，這是無人能夠改變的事實，你同我，都試過17歲，試過俾人追求﹑俾人愛護的感覺，只係而家咁岩無對象，但我不認為同年齡有直接關係 (即妳好老無男人會鍾意妳的「事實」)。

如果夾硬說是跟年齡有關，我只能說是自己的心態﹑經歷﹑言行舉止等都經過了歲月的洗禮，要既野 (包括男人) 已經唔同，同時地，別忘記所有人都在變，當雙方包括年代都在轉變的時候 (come on，我中學時男仔鍾意酒井法子﹑友阪理惠，而家係Hyuna, Girls’ Generation)，妳單身並唔係純粹「唔再後生唔再靚」，而係咁岩，最適婚的時候沒結婚，再識過又唔係咁易識到投契的，再加上香港係的的確確女多過男，造成我們單身。But please…. 唔好成日俾d姨媽姑姐﹑傳媒﹑speed dating公司好似洗腦咁，不斷話妳「再揀就嫁唔去」，跟住妳自己就好panic﹑又無自信﹑又好擔心真係會無人要，或者俾d所謂後生過我的女仔搶走我想要的男人。

一講到24-5歲的女仔，我就想起我前公司那位90後妹妹，我好難想像，有人想將我，同呢位妹妹仔比。佢除左後生過我，我真係好想問自己佢有咩好過我？而我要驚佢？覺得我會輸俾佢？純粹佢24歲，後生過我？

簡直荒謬!!!!!!!!!!!!!!

首先，無論我學歷﹑修養﹑外表﹑啖吐都優勝過佢，我唔係詆毀佢，我同佢係同事，大家互不相干，但當有人想話因為年紀問題，我們30+的姐姐會輸給這些後生女，涉高枕頭諗清楚，妳不覺得好荒謬嗎？

24-5歲而能夠有腦﹑有美貌﹑有智慧的，其實不如妳想像中那麼多，好多都一舊雲發緊夢，還有很多我接觸過的，都很不踏實，而有返咁上下錢同成熟的男人，某程度上好驚呢d得個樣但溝通不到的「後生女」。好似陳瀅咁後生咁靚又有腦的 (無腦都唔會紅得咁快)，選擇多到嘔，點會睇得起我們中女眼中above average的男人，而事實上，人地男朋友係賭王個仔，過千億身家呀，普通男仔，點追呀？唔講陳瀅，講我自己，我24-5歲都不知幾風流快活，剛出來做野搵到錢，做好多新的工作﹑識好多新的人﹑有人追下﹑拍下拖，「無人要」呢3個字從來無出現過在我那時的字典上。

眼角，也相對地高。

Come on，有選擇嘛！你有10個選擇，唔揀第1個，仲有第2個﹑第3個…. 而且那時對婚姻沒有憧憬，完全無諗過呢樣野。

說到底，這是timing的問題。你睇周慧敏﹑林心如﹑溫碧霞，邊忽似40幾歲？當然佢地有錢，用好的skincare﹑吃好的保品所以keep得咁好，但我意思係，如果妳外表同心態都keep得年輕，邊個知妳幾多歲？唔通個男仔第一次約妳去街就問妳幾多歲先追妳？而佢知道妳30幾歲而唔係外表看來的25歲就唔再追妳？

我覺得，自信對一個女仔好重要，自我感覺良好，就像一朵散發香味的鮮花，吸引蜜蜂來採蜜。如果妳不澆水﹑自我放棄等凋謝，香味已經無，連最實在的一點花蜜都沒有，哪有蜜蜂來採蜜？

請看看鄧文迪，差不多50歲，生左2個女，結過婚又離過婚，都仲有好多男人鍾意佢，而且個個有錢有地位！前夫傳媒大亨梅鐸﹑俄羅斯總統普京﹑前英國首相貝里雅，到最近傳聞30歲的小提琴家靚仔男友 (雖然我覺得係炒作)。鄧文迪本來就是耶魯畢業生，聰明﹑勤奮﹑做人非常有目標。靚嗎？一點也不靚 (起碼我們中國人角度)，但佢好高好瘦，知書識禮，行出來有台型。

我所說的花蜜，就是女人的內涵。我們無法停止自己一年一年的「老去」，但有能力不斷加深自己的修養。妳對自己年齡和外表失去信心都不是最壞，但不可以放棄做個有內涵的女人。

值得感恩的小事情

決定開一個post，記錄我覺得感恩的小事情，一發生就更新在這裡，希望有一天再看的時候，回想起曾遇到某個好人和某些好事。

  

1. 7/4/2016 網購一瓶眼霜，要滿300元才送貨，加錢也不送。那個職員跟我說：「我就住在你附近，我拿來給你吧！貨到後我再致電給你。」那天我上瑜珈上到好夜，9點先返到屋企，那職員在家一直等著我，我也感到很不好意思，就只80元的貨品，就算是800元，她也沒必要這樣做。這職員，人就是好，舉手之勞，她就是樂意去做。俾著其他人，無著數又三不識七睬你都有味！而她，穿著一條長裙，就像我幼稚園時的miss，容貌非常和藹可親。
2. 1/5/2016 去行山遲了出發，地方比較偏遠我未去過，要巴士轉巴士。本來已經遲左，架車還等了15分鐘，心急如焚，遲到個host不會等人的。終於上車，check KMB另一巴士下一站的到達時間，竟然跟我坐緊的是一樣，即是話，另一架不是在前，就是在後，我在隧道看前面的巴士，不是我要搭的，但望不到後的。心好急，落轉車的地方，誰料我要坐的巴士就在後面。要不我那位司機大叔駕得比另一位快入隧道，我肯定會miss左班車，要知道山卡拉的巴士是半個鐘一班！結果，我還早到5分鐘，好驚險！
3. 17/5/2016 從首爾回香港，倒塔咁早飛機，要退稅又要去樂天拎我兩大袋的戰利品，所以勁爆早起身，諗住搭6:25 airport express，拖住個大行李慢條斯理的行，中間仲去便利店買水，前面個大叔買煙阻住我俾錢好耐。結果落到車站是5:55，仲catch 到6點班車。（遊記後補）
4. 22/5/2016 放工去跑步一口氣跑左4km無停過，共30分鐘! 對於次次1.5km就要停一停的我來說已經好勁。當晚天氣無咁濕跑得舒服，無諗過自己可以跑到，但反而跑順左條氣係唔想停，做運動做到一個點就是自我虐待而仍然好enjoy的就是一團要瘦瘦瘦瘦瘦瘦瘦的火!!! 抖左陣再跑多2.2km，拉拉筋，感覺非常滿足! 會慢慢加上去同希望可以係一口氣唔停。
5. 23/5/2016 今天終於賣出我第二個手袋，雖然都蝕$1800，但彌補左我昨天又買新手袋的罪疚感！而今次個買家好nice，準時又細心。Betty自覺幸運賣左兩次袋交收都很順利，最怕那些麻煩友！
6. 5/6/2016 第1次去soho間gym，踩左踏板機30分鐘，少少瑜伽，加跑左45分鐘。我發覺我體能好左好多，之前我用跑步機跑到一半已經好攰。因為呢排跑街train過，辛苦好好好多，香港天氣太熱太濕，室內有冷氣，不過我跑得唔快，7.5kmh，臨尾加到8，最後共跑5.3km (原來咁少!) ，如果不是已經9點我可以繼續跑多半個鐘 。走時拿了2個蘋果，成功劇烈運動後忍到唔食野，如果日日都可以咁，想唔瘦都幾難!

［陸續更新］

To Be Seen by Men

較早前說過，Betty對於工作7年也是圍繞著女人感到十分厭倦，決定要脫胎換骨，重新做人。以前只希望在事業上打拚，中間都出現過好多唔同的男人，兜兜轉轉，覺得自己在錯的地方工作﹑在錯的地方識男仔。當經歷無數的失敗，人才會醒覺，同死心。

要改變自己的路向同心態一點也不容易，尤其以Betty有點self-centred的性格，如果不是跌到遍體鱗傷，都不會死地氣去歸於平淡。

轉工後2個月，經過Betty的努力，終於令自己身邊出現多一點男人，而且質素都很不錯。今個月新來了一個VP，好斯文有禮貌，說不上靚仔，但就是decent。大bank轉過來，外國讀書，年紀同Betty應該差唔多。公司另外一個大陸男仔雖然太細個才剛大學畢業，但以Betty超準的觀察同直覺，佢一定係有錢仔。佢在美國長春藤畢業，而且又係好有禮貌，睇佢著衫﹑談吐就知佢唔係普通大陸仔。另外，CEO個仔又係好靚仔好有禮貌，雖然又係20出頭不是Betty杯茶，但我覺得這兩位少男絕對係富二代筍盤，大把女仔喉住。唉，可惜Betty姐姐大佢地起碼6,7年。Betty姐姐自己收自己皮，但仍然樂於見到自己可以回歸正常的工作圈子。

另外，Betty行山都識左個好樂於助人同善良的男仔，佢唔靚仔，眼細細黑黑實實，但個人好好，好純，好肯take care路上的同伴。呢d男仔而家真係買少見少，雖然我唔知佢有無女朋友/ 結左婚未，但Betty就是有好感啦！

我諗而家我好清楚自己要咩男仔，有時真係好睇「識唔識到」，識到已經係成功的一半，另外當然最重要對方係咪single。踏入30的Betty要識男仔真係要費點心血了，我好明白自己已經不是17歲時的Betty，無論是我這個人，還是整個環境已經變遷了。

其實，Betty年初時所講的大計，就係計劃出國了！一切已經於上年準備好哂，萬事俱備，只欠一張機票。我到而家正式announce出來，係表達我對出走的決心，而不是說說而已。我計劃左好耐﹑儲左好耐錢，IELTS都考埋，只係Betty媽身體抱恙，我不忍心這個時候離開她，所以就免為其難搵左份工做住先，做落又出奇的開心，同事出奇的好。

有時世事真係唔知點解，我無諗住長做，但公司俾我的人工同機會，都是可以長遠發展的考慮；對在香港識男朋友已經心死，但偏偏俾我滯留在這裡的2個月遇到令我覺得不錯的男生，當然again大前提我唔知人地係咪single，現階段都係新相識的「人」，朋友也說不上。不過亦係因為咁，令我對他們的期望減低很多，因為大不了，我就買張機票出發，沒有留戀。

頓時間，我覺得「有得揀，你至係老闆」係何其重要，當你無第2個選擇，而第一個你又achieve唔到，你個人會無哂方向，好desperate好down；但當你有第2個選擇，你對爭取first choice無咁大壓力，有就開心，無就去second choice囉，Betty而家就係咁。尤其我都使左咁多錢搞出國的手續，絕不是兒戲，我是很認真的。

我跟Janet說，如果這段時間我能夠認識一個令我動心﹑令我覺得值得放棄出國機會的一個人，我是會留下來的。但若果沒有的話，我也不會覺得失望，只會令我離開得更加灑脫。

女生的主動

不少朋友都說我Betty太被動，而我自己一路都覺得自己已經好主動。Overtime，我開始認真去鑽研點先為之「主動」。

回想起F.6/7時，是Betty最多人追的時候，隔離班都有2個男仔鍾意我 (嘩，青蔥歲月呀！)。那時候，科技沒現在發達，沒有whatsapp/ facebook，只有ICQ同無乜人會用，收費5毫子一個的短訊。我記得那時候，男生總有方法找到我的ICQ然後add我，再叫我身邊的朋友同我講「accept左friend request未呀？」

有一個男生，F3時已經暗戀我，記得我add左佢ICQ後，佢同我講︰

「唔好食咁多牛柏葉，用好多化學劑漂到咁白架！」

你怎會想到，一個男生跟著你，看你lunch time去哪裡﹑吃什麼。我上堂訓覺，佢又會話︰「我今日見到你上Bio堂訓覺！」聽落好變態，佢無時無刻都留意住我，但到而家，我先發現有個人咁鍾意你同關心你，係幾咁難能可貴。

這個男生喜歡我超過10年，直到4,5年前，佢仲係追緊我，帶左我返屋企 (我都唔係好記得點解會跟左佢返屋企！) 2個人共處一室，可以發生好多事，我知道只要我好sweet咁錫佢臉珠一啖，Betty就有一個好錫好錫自己的男朋友，但唔知點解，就係無火花。再到1,2年前響街撞到佢，佢講緊電話，我下意識想走過佢打招呼，但佢好尷尬笑一笑就低頭繼續講電話向前行。不久在facebook看見他原來拍拖了。

男仔對女仔突然冷淡的態度，其實原因係好明顯。我當刻都估到佢拍拖，唔想我誤會佢仲鍾意我。

如果你問我後唔後悔，我唔後悔，呢個男仔人緣好好，讀書時好多同學仔幫佢手追我，係一個好好既男仔，但有時感覺既野，無就係無。如果唔係我呢幾年都無拍拖，我諗我都唔會諗起佢。

F6時那個男生，給我寫情信，係呀，好老土！到而家2封信一張佢自己整的咭﹑送給我的心形cushion還在。那時我極度厭惡我同佢成日俾2班同學討論的對象，我好唔鍾意佢鍾意我這個感覺，而且好唔鍾意成日俾人講，所以我基本上係完全唔睬佢，張咭佢寫︰

“Don’t put your cold shoulder onto people”

那時我ICQ block左佢，佢就send SMS俾我，因為知我一定會收到，那時真係無人send SMS架！5毫子一個，而家我地都嫌貴啦！

一切一切，而家諗返起，原來好sweet。

讀書時，大家什麼都沒有，對大家的感覺都很單純，不會計較你屋企有無錢﹑你著咩衫﹑讀咩學校。原來人與人之間單統的喜歡，只建基於大家「什麼都沒有」之下。

Facebook教主Mark Zuckerberg識佢老婆Priscilla時是個又矮又唔靚仔﹑又唔交功課的geek，而Priscilla是醫科學生。很多名成利就的男人的另一半，都是識於微時，好少話，當呢個男人成功了，你再去認識到他。坦白說，就算俾你識到，佢去評核你能否成為他女朋友，再不是青梅竹馬那種單純的喜歡，這是個殘酷的現實。

好多人話港女現實，要男仔有車有樓，大家知否而家男仔同樣係咁高要求？Betty現在識男仔，對方會問你做咩工﹑住邊，淨係呢2條問題，佢已經知道你大概的底細。而家男仔會介意女仔做咩工﹑搵幾多錢，可能未必要你搵好多，但佢唔會expect你在餐廳做waitress，或者係貨倉度做倉務員。簡單點來說，而家男女真的很平等。

我上網睇youtuber點樣識佢老公，包括beautifymeeh & Promise Phan，不約而同地都係佢地首先撩對方講野，跟住製造機會俾對方約自己，但「追求」這一個東西，仍然必須係由男仔做，這就叫主動。

我在認真地想，為何我會不懂做主動？

To be very honest，由細到大都係人地追我，我亦無做過什麼去令人鍾意我，just everything happened naturally~ 到而家，年紀大左，時代唔同左，除左我身邊好多男仔都結哂婚之外 (come on! 30幾歲喇，唔係當年的17歲！) —- 即在市場available的男生已經由17歲時的95%跌到現在少於50%！另外就係，我覺得而家的男仔無乜心機同耐性追女仔，有幾多個會寫情信？以前科技無咁發達，反而會好珍惜能夠reach到對方的機會，而家要reach到一個人實在太容易了，一click個制facebook/ instagram乜都睇哂。容易搵到對方，send個message亦變得無咁認真，所以點解咁多人為「女仔/男仔唔覆message」而咁苦惱就係呢個原因。

叫Betty做主動追男仔，就等如叫一個打左一份工10年的人去重新搵一份工咁，點樣寫resume？點樣interview？interview講咩好？著咩衫去？

而呢個邏輯，都解釋到點解咁多讀女校的女仔，溝仔總係叻過讀男女校的女仔，因為學校無，所以有機會識到男仔就會好珍惜。