笨男人

Betty好少出去睇戲，成舊水睇場戲，倒塔咁早睇半價票，都不是Betty杯茶。Betty好outdated，是等小米盒子上畫先睇，所以最近才看了口碑很不錯的”我的少女時代”。

我真的希望，自己不是唯一覺得套戲一點也不好看的一個人。王大陸有咩咁吸引？個故事老唔老套左啲？拎住劉德華個人形紙牌打交打到流血，又撞車入院開刀，跟住由另一個男仔話俾個女仔知：其實佢真係好喜歡你！真係流星花園都無咁老套。在camp site王大陸的對白更是oh my gosh。仲有喂，人地王大陸同個陶敏敏響天台擔住把遮啫，無kiss手仔都無拖，使唔使傷心到咁？人地無話鍾意你，你地又唔係拍拖，可以唔開心，但未致於喊成咁，無端端PK再加場大雨，好難說服Betty投入落去。我不知道是我不懂浪漫，還是沒有過這麼甜蜜的初戀，所以沒任何感覺。只是一套普通的偶像台劇，莫說是電影制作，更遑論好看。

早排在facebook看見朋友share一篇文，覺得好有共鳴，又令我聯想起Queenie:

 
像Queenie一個沒甚文化的人，用「波」來形容自己個胸，身邊竟然是好有藝術氣息、穿著筆挺西裝、香港管弦樂團成員的老公，連cello也不知道是什麼，但偏偏老公是拉cello。

就在那個月黑風高的晚上，跟Queenie拍拖加同居不足3個月的Joe哥 (Queenie的鬼佬老公)，大腦偷懶坐住左，唯有借用下體思考，諗住一個晚上啫，無野既。點知，恭喜Joe哥一擊即中，中了一個照顧對方兩母子一生一世的巨獎，還來不及了解這是個什麼樣的女人，已經別無選擇地要焗娶佢眼中“仲好細路女”、“she needs guidance back to the right track”的Queenie姐。一個哈佛Music School畢業的知識份子，就是那晚個腦坐住左，咁就一世。當然，有仔送終可能Joe哥已經好滿足，但當你以為音樂家應該配返好有內涵、背景相約的女子，你就會好失望。都好既，Betty之所以三張野仲未嫁得出都可以咁處之泰然，都係因為見到Queenie同Joe哥呢對絕配。

不施脂粉以為沒有殺傷力的女人我也見過不少，最早嫁得出的，有些更是嫁得不錯，也正正是這類女子。

「當你以為那個每天濃妝豔抹的女生是綠茶婊時 其實她老實到連觀音兵也不收，假日也只是留在家裏煲劇吃泡麵。」

這豈不是Betty我？無男仔約去街，剛剛才煲了那套無聊的”我的少女時代”，唉，真是非常唏噓。。。（雖然我是化妝而不是濃妝）

 
上回說到那個LinkedIn的外科醫生，本來的確諗住不回的，但Betty做了一個小實驗，跟他說我老闆想投資德國的酒店，咁我好簡單問佢有邊幾間酒店最出名、最有特色，點知條友的回覆是：

So this is a reply or what?

有無收過男仔得一句的電郵回覆？有，我收過，我真係收過！

我寫俾佢個電郵雖然係一條問題，但說到底都有幾句。其實我個電郵咁短一是想畫清界線，擺明唔諗住浪費時間同佢調情，二是想測試佢的反應，想不到俾我Betty估中左—無著數睬你都有味！

很多男人都是幼稚，諗住用低成本「好認真」去識女仔，如果當大家係萍水相逢的網友 （LinkedIn 仲要本來是一個career oriented的online social platform)，一條咁簡單的問題都唔願意答，超級小氣兼市儈，覺得我係搵佢著數，唔係交心同佢做朋友。首先，網上的東西本來就是虛擬；第二你自己離婚有個女，點樣expect要人地同你做朋友？純粹因為你係醫生？當然有好多香港/大陸女仔會唔介意，可以嫁去外國喎，醫生喎。我只係覺得佢呢個答案好小家。

其實識多點人係好架，因為人，真係無其不有！

Online Dating：LinkedIn

最近不知為何有幾個人message我話想同我做朋友，其實我一路張profile pic都無轉過，係去過Kylie婚禮 （其實我極度懷疑有一個係Kylie婚禮佢老公的朋友，咁我同Kylie影相佢 tag返我），有一個我響倫敦行博物館行到好攰坐低無聊Facebook check in 無幾耐就有人add我。其實，我覺得大家可以聰明地善用technology，好過俾錢玩online dating app。當然都係我Betty自己老吹，對方無話係我亦無證據，哈哈。

Linkedin這個東西，好多年前仲讀緊大學時一位上司教我用，話外國好流行，所以Betty的LinkedIn account已經好多年，但一直投閒置散無咩用。到前1-2年我同Janet講想去Speed Dating，但要6000蚊，Janet很簡單說了句：

「點解你唔試下一些唔使錢的方法？如LinkedIn?」

Janet那段日子識左個都係附近返工的男仔，有約食lunch。當然，佢有男朋友，而對方又矮又唔靚仔，無乜吸引力又無激情 （說過Janet其實好貪玩），所以好快已經無再搵對方。但anyway, it’s possible and feasible!

Linkedin本來是一個給專業人士搵工同工作上聯誼的地方，好多headhunt日日就係捕住個LinkedIn,亦有好多人上去搵business partners，所以玩Linkedin的都是專業人士。有時候，可能咁岩見到妳個profile，見妳幾靚女，工作有點關連，就會send message俾妳做個朋友。

不過Linkedin近年已經變左質，好多女人張profile pic唔係好著衫，但同人講自己係headhunt，而間公司我聽都未聽過。我又見過我老闆架私人飛機的公司的空姐，張相係大露背，仲露半個胸。嘩！做空姐o者，使唔使真係露埋個「胸」呀？總之就黑暗啦。其實我在想，究竟好男人死哂去邊？有幾多個見到個靚女露對胸覺得好嘔心唔想望，唔心動？如果露對胸無用，d女人就唔使露啦，係咪先？而我睇下d男人的replies都係話佢好靚呀，好誘人，好想date佢，諸如此類。

我Betty唔係好用Linkedin的原因，係因為我之前轉工轉得好密，真係都唔好意思話俾人知，而且又唔係讀咩名牌大學，無謂獻醜啦！所以我好簡單一張無露胸仲包到實的生活照，同而家呢份工就算數。Over the years，都有真。headhunt搵過我，仲試過有U.S. navy/空軍send message俾我，空軍係個阿叔，另一個海軍話自己駐守緊敍利亞，嘩！其實我無咩興趣同d生活太不相同，同距離太遠的人做朋友。私底下，我好討厭美國人侵佔人地的地方扮大佬話要保護人地，人地而家民不聊生都係因為你咋美國佬！我Betty最憎虛偽的人，而且呢d士兵，肯定好proud of自己為國家打仗，係世界的英雄。美國政府奸到出汁，但國民出奇地幼稚。

OK back to正題，到前幾日有個德國外科醫生send message俾我，年紀唔細，40以上，樣八成似George Clooney, 斯斯文文，係Betty的type。來往第二封email，佢已經同我講有個女，咁我無問佢婚姻，因為我已經無諗住再覆佢，但應該係離左婚或已過身。 

 時間好寶貴，我唔覆也是不想浪費大家時間，做朋友都無必要。 

 （網上圖片，跟本文無關）

其實我唔介意男人離過婚，但一定唔可以有小朋友，我無興趣做人繼母幫人教女，仲要係一世的包袱，呢個係我對一個男人的底線。而最重要既，係唔可以呃我。

男人分兩種，聰明同賤。聰明的，就一早同你講有老婆有仔女，等自己出軌得無包袱，放假名正言順唔可以陪妳，但又狂追妳，對你超級好，管接管送，妳會心動，怪大家相逢恨晚，好多無定力的女仔會就咁跌落火坑，回不了頭。賤的，就當然係呃住你，就算俾妳發現佢都唔會認。男人always覺得自己好叻，女人氹兩氹就好。很遺憾我呢兩種男人都遇過，我亦proud of自己無跌落火坑，只係當我遇過太多唔好的男人，令我對自己無哂自信，亦好難再去信人。

2016 New Year Resolutions

想不到這麼快就一年，原來在wordpress已經2年時間！今年Betty年初外遊，現在才補寫：

  
1. 希望儲到20萬 

成果：真係儲到喎，不過要加返倫敦使左的錢先有，給自己勉強過關

2016目標︰來年Betty將會使好多錢，如我之前透露過，我2016年是有一些突破性的計劃的，但還沒實行前不想告知任何人，當然我身邊幾個好朋友知道，及我美國交流的homestay都知道，因為他們都是我最信賴的人，也很愛我和照顧我。我暫時還沒敢告知父母，因為我不想他們太擔心，始終事情還在安排中。

2. 識到一個好鍚我﹑好明白我的男朋友

成果︰ 還是未有，哈哈

2016目標︰很多朋友都很替我擔心，覺得我不應該再挑了。其實了解我的朋友，都知道我不是大家想像中那麼挑的人，如你是這樣看我，只證明你跟本不認識我，包括我的為人和過去。我想我現在很清楚自己想要一個怎樣的男人，無奈只是未能遇到，這是命，也是緣份。有些朋友說我不應該守株待兔，應該主動去識男仔。大家有看我blog的，都知道我除了有玩唔使錢的hongkongcupid (Queenie介紹我玩，她在那識過幾個男朋友），又俾過錢玩Lovestruck，也去過活動，同自己唔鍾意的男仔約會，仲試過要自己比錢同男仔去街等等，所以我唔覺得我唔主動，只係唔好彩，同去錯地方識男仔，也因為自己有眼無珠去識人，浪費時間，最後造就如今咁「宅」的我。因為我終於明白，是你的就是你的，不應該強求，如果這是命的話，也只能認命。當然我還是一個很平易近人的人，朋友約我出去玩，我仲係好好玩，只是再沒有以前那種幼稚的思想，和過份浪漫的幻想。

3. 帶埋爸爸去 (先去一次台灣先)

成果︰ 同爸媽去左台灣啦

2016目標︰老父想去美國探望幾十年的好朋友同衝出亞洲，奈何我無假了，會替兩老報旅行團

4. 希望做到多一點高難度動作，現在我的技術好停滯不前，話我唔識瑜珈又唔係，但好多有難度的動作我還未做到，努力在練bakasana

成果︰ 終於做到bakasana!!! 不過要看狀態，做到這個動作才知道core同平衡力非常重要，太攰無力做唔到

2016目標︰headstand，不過Betty對眼做過手術，看見有人不建議做，所以覆診問下醫生先去練 （不過佢一般都會反對）

5. 宅成咁，當然好多時間陪屋企人。諗過另一項～ 

2016目標：我想買多些靚衫靚鞋，比多點心機打扮自己，我一向是比較causal，但覺得人靠衣裝係好現實，現在的我有錢afford到買漂亮的東西

6. 同爸爸嗌交原來是我們的溝通方式。諗過另一項～ 

2016目標：好想自己的秘密計劃能夠順利達成，得到父母支持，並在各方面有所收穫

7. 在街上跟四目交投的陌生人微笑

成果︰ 多左同人有眼神接觸，不過又未致於笑

2016目標︰多點留意身邊的人，如果佢看來友善，就對佢笑返

8. 到我呢個年紀，再沒機會識好朋友，其實我覺得我個人係好左架，都有朋友咁讚過我，說我沒以前自私任性不理人感受

成果︰ 有時我會覺得曾經一些很熟一起去玩的人，到現在再不是朋友很可惜，有去個旅行鬧翻了，有為左個男仔互生心結，有些自以為大家是朋友，結果對方生活愈來愈好，嫁到好老公，生左小朋友，過少奶奶生活，對方認為跟我已經是不同世界的人，不需要特別維繫。Well 可能人家一開始就這樣想，只是自己過份beautify大家的友情。原來人，一定要不斷進步，否則會被人嫌棄。當然這是因為大家不是真朋友，不過的確，當你生活不是特別美好，也比較少人想跟你keep in touch

2016目標︰放開一點，人家嫌棄你，也不用死纏爛打去catch up，有2-3個好朋友，不是已經很幸福了嗎？

9. 慎言，我覺得個人係化左，唔再對人﹑對個社會有抱怨，反正就算有多不滿意，也改變不到其他人﹑這個社會 (我意思係憑我一個Betty改變不了香港將來有無真普選)。由於Betty還未嫁得出，所以未有多餘的心思氣力去改變香港，2015年我還是先理好自己

成果︰ 人愈大，更加愈少說話，是好還是不好？

2016目標︰不說話了，是覺得說了又怎樣？instead of怕得罪人，我現在是genuinely 不太喜歡說話

10. 徹底失敗，我想我現在是115-118。有人跟我說做瑜珈會愈做愈重，可能因為有肌肉。我做按摩希望按瘦點對腳，不過暫時效果不太明顯

成果︰ 我現在是120磅！但身型其實是slim了。我看過韓星soyou分享減肥心得，就是她從不磅重，只有望著鏡子，覺得哪部份不滿意，就主力減那一部分

2016目標︰還是有點肚腩，腿也需要再瘦一些

11. 想去行山，但無伴。都無乜朋友好似我咁得閒，得閒的對行山無興趣。香港已經有減少郊野公園用地的intentions (thanks to PK地產商），好快可能我們再看不到如大浪西灣、萬宜水庫的美景。行山又健康又可以呼吸新鮮空氣又免費，好過去clubbing唱k啦

12. 不再一個人去旅行。雖然我享受自己一個人穿插大街小巷的時光，但有時候，多一個人睇地圖、多一個人幫手拎野、多一個人食多點東西、多一個人可以去遠一點的地方、多一個人分享旅程，感覺很不一樣

小男生

這幾天看回《繼承者們》，一群個樣雖然都似18歲，但思想和行為一點也不18的人在爭產和愛得要生要死，好誇張，還幸朴信惠又真係幾清純幾靚，楚楚可憐的，而且難得找到一個女孩襯得起李敏鎬而不覺得造作。一個清潔嬸嬸的女兒，被家少爺看中，展開猛烈追求，另一邊廂再一個酒店太子爺不斷在做女孩的黑騎士保護她，犧牲自己去成全對方，噢～～～ 這是多麼的浪漫！

韓劇，不要看太多，太偏離現實，worse case搞到自己好depressed，點解我不是車恩尚？！

韓國本來就是一個超大型詐騙集團，去到韓國你不會看見李敏鎬和朴信惠，街上有7成人都整容，成舊包眼細鼻扁就是原種韓國人 (請觀看以上Youtube video，原裝韓國人，但我personally really love the song!)，有小部分像全智賢天然的美女已經搬上螢幕。韓國是全世界最高自殺率的國家之一，社會問題非常嚴重，我看過一篇報導韓國有不少年老的嬸嬸，需要賣淫為生，因為韓國的老人政策很差，沒有好好照顧年老的國民。再說，韓星一年都不知有多少個自殺，走紅的是好彩，有很多使好多錢整容、節食，很努力工作也是紅不起，走上不歸之路。

不過，劇中有一句我很喜歡的對白，金嘆爸爸教兒子做生意，說：

「沒有敵人，等同沒有自己人」

在辦公室之中，是多麼的對，所以老闆不會重用太老實的人，這類人也只能平淡的逗份糧，不會是個能夠成功的人。當然，有好多人，如我Betty，只求平淡過日子。

最近不知為何有好幾個「少男」add我facebook，全部都90後，真係OH MY GOD。我Betty個樣真係好細個既，去到外國鬼佬說我21歲，就算在香港，一般人都以為我最多25-6歲，其實我Betty已經三張野！😁好多人問我點樣keep到個樣咁細個，我覺得心態好緊要，我到而家都好鍾意毛公仔，仲好鍾意睇小丸子同蠟筆小新。另外我覺得都是重點的，就係我好早訓覺，一般11點前就訓，而且我唔蒲，唔食煙唔飲酒，你會發現喜歡夜蒲的女仔殘得好快，眼尾不出2年已經有魚尾紋。最後Betty深得婆婆優良遺傳，婆婆過身時皮膚還是白滑的，我地成家人皮膚都很好，從不長暗瘡。

講返少男，我不知道90後的小男生是否都喜歡傳自己的相俾人睇，2個都係咁send俾我，自拍又有，煮野食又有，去旅行，敷mask都有！真係嚇親我，咩事呀？！我加佢地，老實說因為我無聊，覺得傾下計無妨，但我真係唔知點回應張相，唔覆啦，跟住又say hi又問lee無路。無包袱的人真好，因為佢地唔會諗點解我唔覆佢，只是好單純想同我傾計，亦唔覺收不到回覆是「無面」。同埋，另一發現是，少男好喜歡吹噓自己的工作，「今晚要做到零晨2-3點」，「4點先食lunch」；姐都曾經年輕過、捱過，當然知道OT到3點的痛苦，也試過3-4點先食lunch餓到胃痛，看見他們滿足地跟我炫耀工作有多忙多辛苦，不得不承認Betty已經「老了」。相反，我約會過的30+男士，甚至我身邊的男仔朋友，都絕少提公事，就是太辛苦太大壓力，所以唔想提，也不想人知道自己工作上的不快。這，相信就是一個人成熟的印記吧！