每逢節日,都收到來自四面八方的祝賀語,包括一些三唔識七,甚至你唔知佢係邊個的人。
當中當然也有你有意思的男生。收到喜歡男生的短訊,歡喜若狂,此乃有別於其他無謂人的短訊,你盼望著這個短訊隱藏著某些意思,思索著應該回應甚麼﹑應否以問句作結尾,還有隔多久才回…… 這是坊間老套的覆短訊心計法,work唔work我真係唔識,因為我Betty從來都不是一個這樣懂得玩心理的人。奈何對於「你喜歡他多過他喜歡你」的對象,玩心理不能少。而對於很明顯想追求你的男生,當然不用花太大心機,你喜歡你,自然好message你,兼且有很多問句,希望你會繼續覆佢,不會講完一大輪仲係遊緊花園,無結論,也沒有ask you out,o徒氣。
Betty向來是個好nice的人,你message我,我一定會覆返句’Happy New Year/ Merry Christmas to you too!’。但有一種我是不會覆,就是一些好明顯係一lot過send出來的祝賀語或公仔,此乃我最討厭的一種短訊,那些人,連自己send o左俾邊個都唔知,那我為什麼要覆?對於我有意思的男生,我會俾2次機會,第2次他再無好明顯的企圖,我就以後都唔會再覆。譬如有個男生,聖誕時認識,他祝我聖誕快樂,我覆了,但他無下文;新年祝我新年快樂,我又覆了,他仍然是無下文;今天他又發馬年快樂給我,我是不會再覆了,下一次應該會是情人節快樂,再下一次會是復活節快樂。有些人,發短訊沒有特定的目的,就是方便,按個制就發給所有人,叫做久唔久令你記起佢,尤其現在whatsapp/ wechat 咁方便又唔使錢,如果要錢,你睇下o的男仔有無咁神心個個都send。
所以,不要對男人的短訊有太大的期望,當然,一個短訊可以是一段美好姻緣的開始,但要看其內容及回覆的速度,齋吹沒意思。
最近我看以前一位女上司的facebook,她竟然結婚了!她是好一個超級港女,其實只大我一﹑兩年,但已經做到consultant,MPhil一名,在大學做tutor,學wine tasting,跳性感肚皮舞,手拿Chloe手袋,對人好有要求,所有香港男人都差不多看不上眼,只有鄭家﹑李家的公子才配得起她。就算對其他人,她也是「靚過佢唔抵得,樣衰又睇你唔起」那種女人。所以以我所知,這麼多年來她都無拍拖,想不到尋尋覓覓,又俾佢遇到心中最愛。看她老公,不高,戴眼鏡,靚仔說不上,但就是斯斯文文幾好笑容。嗯,原來超級港女尋覓多年的另一半,就是這樣。有無錢就唔知喇,但斷估都唔會太差。
今天上老闆屋企同designer夾屋內的design,完o左諗住又要呆等小巴落山,但原來他揸車,是一台型格的寶馬,於是就搭順風車下山。嗯,好久沒有坐男人的車 (司機除外啦),對手唔知放晌邊,周身唔自在,車廂小唔想dead air,但又唔知講乜好。我先至realize我真係好耐無同男人約會過,尤其會管接管送的柴可夫司機。不過還好,他手上已經戴上結婚戒子,所以無論我表現得有幾騎哩,都沒什麼所謂了,反正都唔會有任何結果。
馬年,Betty決定要date多點男生,女人在約會時表現得自在,就是平時date得多訓練出來的。如果要獵個好的,就要勤加練習,否則騎哩兼無乜自信的表現,會嚇走人,個樣幾靚都無用。
各位單身人士加油!