膚淺與信念

最近Betty識左個男仔，令我又沉入message的心理戰中。雖然其實我聯想返起，之前追我的男仔，我從來沒有為怎樣聯繫他而感到煩惱，因為他無論如何都會找我，選我最喜歡的餐廳，說我喜歡的話題。從來被愛的女孩子都是幸福的。但別忘了人總是犯賤，係要喜歡一些不應該喜歡的人，令自己唔開心。收不到他的message囉囉luen，但又好明白自己唔可以太主動。其實經歷過咁多次的失敗，再失敗多次都預左，有時我會諗，反正一開始我就是一個人，而且3年以來也是，就當呢個男仔路過吧！咁樣諗我會舒服點。

Judy係我舊同事，曾當空姐 (其實Betty身邊真係有好多空姐)，她一知道Betty終於發市，好為我緊張。Judy好靚女，一直不愁無人追，但依她所說，識親都係asshole，趁佢飛左出去搞女人，真係好難明白一個咁靚既女仔要忍一個咁既賤男2年，連Judy都唔明白點解自己一次又一次咁原諒他。Anyway, Judy已經識左一個好好既男朋友，拍拖半年，所以以過來人身份叫我︰「小心d識男仔！」

鬼唔知阿媽係女人咩？

識咩人係緣份，鍾意左係自己控制唔到。

我︰唔知點解我覺得現今的男生無咩耐性。

Judy: 無耐性即係唔好！唔好的由得佢地走！走左唔可惜。

我︰我覺得外表是男生想了解一個女仔多一點的先抉條件。

Judy: 咁樣係膚淺！

我︰喂，你人又靚腿又長，梗係唔會覺得係一個問題。

Judy: Betty, 你要相信自己，只有keep住自己好好的，好男仔會搵上門。

Judy講的時候，我無咩放在心，佢人靚身材好，梗係覺得人只係喜歡她的外表是膚淺；你無樣無身材的話，就知道個樣係幾咁重要。但當我諗起咁靚女又開朗都係俾男朋友背叛，其實男人真係信唔過，晌感情上，沒有一樣東西是保證，所以我咀嚼Judy那番說話「相信自己，只有keep住自己好好的，好男仔會搵上門」，覺得其實好有道理。「好好」指外表同心靈上，要做個不拘小節，經常臉帶笑容的靚女。

最多朋友的時候

年紀愈大，朋友愈少，雖然是事實，但當真正感受到的時候，心中有種說不出的空虛。

女孩子沒有男朋友不要緊，最緊要是閨蜜，說得是多麼的對！

這星期好多假期，多了時間胡思亂想，應該說，好好檢討自己的過去，將近30歲的女人，事業又無乜，又未嫁得出，連朋友都沒有幾多個，有時候真的覺得自己好失敗！雖然Betty是個獨孤精，我喜歡自己一個人，但我知道，一個人怎樣也不可以永遠的一個人，一個多能幹的人，也需要人幫忙的時候；一個多有錢的人，都有機會有一無所有的一天；最愛我的父母，也會有離開我，不能夠再保護我的一天。從前我從來不理人家怎樣看我，因為我覺得自己一個人也很快樂，我想這一刻思想上的轉變，就叫做成熟吧！

有一天在午睡，爸爸一直偷望著我，我這個醒睡的人，一張開眼睛，發牢騷的說他偷看我，爸爸默不作聲的出去，關上房門。過幾天，我問他為何偷望我，爸爸說︰

「我在看我這個最疼的女兒，還是一個人，我怕自己沒有那麼長命看到妳出嫁的一天。」

聽到這句話我內心傷心透了，平時已經常頂咀的我，30歲人還要爸爸擔心，擔心我照顧不到自己，傷心沒有人代替他好好疼錫這個女兒。我父母晚結婚，爸爸今年已經69歲，好命的話已經兒孫滿堂，有個好新抱﹑好女婿孝順他，可愛的孫仔孫女圍著他繃繃跳。我也很想達成他這個夢想，但我也無能為力，十分無奈。

其實結婚這個問題一直不是一個我很困擾的問題，因為我真的相信緣份。眼看曾經追求我的男生都結婚了，新娘很美很賢淑，是自己走寶嗎？這個世界沒有如果。我反而對「朋友」有了很深的感受。我一直以為自己有很多朋友，讀書時成堆同學，clubbing時一堆出來吃喝玩樂的朋友，但到今天，除了Tasha同Janet，真係再無其他可以講心事的朋友。我還發現facebook有人delete了我，或者校了極高的privacy我什麼都看不到。我在想原來我咁乞某d人憎，我細想我從來無得罪過這些人，近年也沒見面，真係百思不得其解，而當發現她只delete我而不是其他mutual friends，心裡更不是味兒。雖然facebook不算是什麼，Betty亦提過我好少用 (所以沒有發現delete/ hide privacy的事件)，但始終都有點失落。就等如有人無端端打你一巴，就算錯不在你，你也會覺得唔開心吧！

回想在我最多朋友的時候，竟然是我最有利用價值的時候，例如幫人搵工，或者涉時間的最佳人選。

1. 空姐Helena – 未婚前有段時間失業，亦因為之前成日痴住男朋友，所以無哂d朋友。那期她常找我傾計食飯幫手搵工，她跟我說過︰「無野做寄居晌男朋友屋企，又好似無乜朋友」。而家搵到份工，婚都結埋，已經無聯絡好耐。

2. 空姐Karen – 未晌我blog出現過的空姐朋友，跟Helena一樣見工時認識。佢成日同我講想返來地面，唔想再飛，所以陸續我都有send d links俾佢。有一日，佢約我食飯，同我講好想認真搵份地面的工，同公司請左8個月大假，雖然我那時覺得好奇怪，可以咁請假的嗎？但我竟然天真的信了。8個月後，個仔出世，原來那時她已有B，但懶神秘無同我講。其實無幾耐之後她facebook已經post左結婚相，不是秘密，但佢從來無officially同我講佢有左兼要結婚。在我而言，如果係朋友，呢d是喜事值得分享，或者，有些人總是不愛將私事講俾人知啦！但我唔知點解佢唔同我講，但轉個頭已經晌網上公佈。簡單d講，佢唔再需要搵工之後，都無再搵過我。

3. 大學同學Jessica – 此女子出現在我blog好多次，可想而知，我口裡說討厭她，其實是對這個人感到如此的傷心。佢同我講過︰「Betty，我知我晌你病重的時候沒有探望﹑問候過你，my life was just in a mess (所謂的life就是拍拖)。我很懷念我們一起去旅行的時光﹑一起gossip about guys。」我有時也會想，同Jessica某程度上真係幾夾，就咁無左個朋友有點可惜，其實我應唔應該原諒她？但每當我想起我病到差不多死的時候她不單止無探過我，仲掛住我公司同佢公司訂的禮品，兼怪我無幫佢跟進累佢無左張單要同上頭解釋；每次同佢出街我都要成為次等的那一個；有人甩佢底才來約我；口說想我快點拍拖，但有party或有異性的活動都無叫過我去。唔開心/俾人飛要搵人傾通宵就會搵我，總之我就是一個她需要時才需要的「朋友」。佢呢種自私的性格已經令身邊的朋友疏遠她，坦白講，如果唔係無哂d朋友，佢先唔會屈膝同我講呢番說話。

4. 公關公司同事Lena – Lena是個努力攀入ibank的人，可能佢覺得Betty不是同一個level的人，所以都係涉時間的對象。其實要睇係咪搵你涉時間好容易，我唔介意你完左event搵我涉時間，但我同Lena真係無一次係認真約好的食飯，次次都係佢即興約我今晚食飯﹑一陣去瑜伽，我約親佢都好少得。可能係我自己高估左大家既friendship啦。如果係好一般既朋友，可能關係只能如此。

有段時間班舊同學去船海﹑食飯都會叫埋我，現在都沒有了，可能佢地的確搞少左。只是當你無乜朋友果陣，就會聯想那一班﹑那一個朋友消失了，而事實上早於可能1年前已經消失，只是一路以來「朋友眾多」不以為然。

我覺得係時候主動連繫返d朋友。朋友唔搵，就會淡。好遺憾讀書時沒有像M club的好姊妹，曾經好friend的，之後就各散東西了。

30歲還在玩的人

Jessica的名言是︰「後生又靚的時候唔玩，幾時玩？」

好多人以「年輕時任性一番」為由，去做一些瘋狂的事，例如用成副身家去旅行﹑玩one night stand﹑跟有婦之夫去business trip，理論上好合理，可能你會話︰Betty，係咪你自己無錢去南美，亦無膽去玩one night stand，所以覺得人家這樣做不對？Well…. 每個人都有自由，做自己喜歡做的事，但且看我身邊以「年輕可以任性」的頭帶繫在額頭上的朋友，都無乜邊個有好的結果。

拎哂d錢去「遊歷」的人，mentally領悟了很多，但actually也對事業沒什麼的幫助 (which is 好實際！)，要不這群人家裡有點錢不用他們養，已經餓死左好耐，說什麼「年輕可以任性」呢？！年輕是建立事業的時候，唔通你30歲先入間firm度做junior? 俾年紀比你小幾年的人head住你？除非你是已嫁人的幸福少奶奶，打份工純粹消磨時間，衣食住行老公都可以照顧得你好ok，這都勉強說得過去，但，別忘記，老公不是可以養你一世，女人不可以靠男人，到你30幾歲老公唔要你又好，生意失敗又好，那你就只可以在office做個打雜，俾d後生點你做野。

Betty好多出去流浪的朋友都是傳媒工作者，所以就算出去一年對事業影響不會太大，皆因一個記者做5年至升到做senior reporter，中間走幾耐無人會理，反正他也只會給回你15,000蚊做個reporter。但如果從商的話，走左去1年對事業影響可以好大，一般人入大Firm做trainee，晉升係好連貫性，而且升職相對地快，除非做得好差或者俾人炒左，無人會捨得放棄如日方中的事業去流浪。

Brandon是Betty的大學同學，他是福建人，廣東話唔正，但帶有台灣人口音，所以鄉音得來唔會覺得係大陸，係好cute的台灣腔。Brandon讀書時是舊薯仔，typical大陸來的學生，勤奮單純，莫說是去club玩，在學校也只是個十分普通，唔會特別受女仔歡迎的人。Brandon的轉變始於intern時去了新加坡，群了班鬼仔，成日帶佢出去玩，返到來香港完全唔同哂，係completely變成另一個人，打扮﹑性格﹑談吐，變成夜場常客，識親都係靚女，我見過的女朋友都係clubbing出來玩的女仔，你永遠不會想像到，像Brandon的一個薯仔會溝到夜場裡性感野豔的女郎，Brandon就是從22,3歲開始玩，一直玩到現在，當我們成班踏入30歲的同學個個一係結哂婚，一係好似Betty咁收左山的時候，Brandon在facebook還是貼出很多出去夜蒲的照片。Betty心想，唉，其實仲有咩咁好玩，玩來玩去都係得個桔，傷神又o徒時間。我知道男仔同女仔諗的事唔同，但我真係好疑惑男人長期係咁玩，唔厭既咩？所有都只是過眼雲煙的滿足感，2個人在一起應該是互相扶持，傷心時陪在左右，困擾時給最好的意見，開心時一起分享，而不是玩心戰1星期，在床上分享一晚，然後就沒了。事件也只能繼續循環︰meet –> flirt–> date 1 or 2 times –> sex

Jessica其實是個女版Brandon，中學時乖到無輪，衣著也有點娘，去完一轉歐洲之後，我一年四季都見佢打出對34C的胸脯，和雙腿。無錯，就算係冬天，她也是這樣打扮，夏天更加係近乎無著衫咁出街，那些緊身的tube dress，就像一條浴巾圍在身上。後生想show quali是可以，但要睇場合，次次都打出哂俾人睇，無驚喜。初時我們的男同學也另眼相看，「Jessica好sexy呀！」但日子耐左，已經睇過好多次，no fun。Jessica的facebook常常引來咸濕佬留言︰「你身材真係好好！」「你呢輪好似肥左少少…」睇見都想嘔，真係好心佢。俾著我已經delete左呢d人幾廿世，還以這樣的「崇拜者」為榮。Oh my god!

要去玩，細個去玩，而唔係後生去玩。我現在嫁得最好的朋友，都是16歲已經出去蒲，23,4歲隱定下來，27,8歲結婚，而家30歲抱住個仔。要去流浪也是，20歲好去，25,6歲，甚至而家30歲先去，我諗最合理的理由只能說一圓自己30歲前working holiday的夢想，但去完返來，你只會覺得用左一年時間避開左香港，結果都係要返來繼續捱，仲要係重頭開始。有些人話working holiday可以搵好多錢，話可以搵20-30萬返來，是真是假真係不得而知。不過講真，又係果句，除非在香港真係撈得好唔掂，否則無必要離鄉別井去摘生果。而且Betty好信坊間的一句說話︰「你係掂既，去到邊都係咁掂；唔掂既，去到邊都係唔掂。」積極d去諗，出去闖都係一條新血路，well…. 平常心就all fine，但期望太大只會失望愈大。祝友人真係搵到30萬返來開鋪做老闆，唔使再做打工仔！