逃離Facebook的魔掌

開始有不用Facebook的想法，是源自Lena & Janet. Lena是因為不想她的前度看她的東西，就算是delete了都怕他從他們的common friends去看到她的一舉一動；Janet呢，就純粹是懶。

我承認是因為我朋友不多，不像有些人經常有派對聚會，吃喝玩樂，周遊列國，所以有很多照片跟人分享。我不明白香港人總喜歡為食物拍照，用app將所有食物排好，加上日期然後放上網，tag埋餐廳先正式可以起筷。每次我看著美食，心想：

「可唔可以影快點？！」

現在有個習慣，就是起筷前我會問一句：

「有無人要影相？」

因為試過好幾次不問之下急不及待夾野食，有人尖叫：

「我未影相呀！」

Betty難辭其咎，畢竟那碟意粉已被Betty一叉撈勻左，已經唔靚仔，擺唔到上網。

第二就是當然是因為Betty無拖拍，無任何甜蜜時光跟人曬命。Betty拍拖時，也只是對方擺我上網。

第三，Betty不自戀，也不愛自拍。

唯一Betty喜歡去旅行時tag那個地方，就像是自己的旅行印記，不過Betty連這個都戒了。如今Betty的Facebook已有近2年沒有上載過任何東西，初時都有share一下有趣的短片和文章，不過而家連share都沒有了，我想我的Facebook徹底的「清白」，讓人不知道我的近況，不去猜測我做什麼工作，有無拍拖，男朋友係邊個。

不知道大家有無發覺，對一位朋友的認知，竟然來自他的Facebook.

「他好像結婚了，他好像生左個仔，他好像轉工了，她男朋友好像請她生日環遊半個地球，他剛一個人去了意大利，她好像識左個有錢仔⋯⋯等等」

Betty不喜歡自己的近況，是在網上被人知道，而不是親自從我口中得知。人，從幾時開始，沒有正式的溝通，而是「無呀，我睇佢Facebook知架咋」。

戒Facebook是有一個過程，尤其一些本來痾屎不出都要上載等人like/ comment那些人。以我Betty本來也不太爛玩為例，初時都有條癮要upload一點東西上去，試過差點按send，還是cancel了。每次提醒自己「唔好send啦」，慢慢地就會習慣唔用。

當然幫我戒Facebook的，還有這個blog，有什麼不快，想發洩的都寫在這裡，我亦有一個絕少人知的微博，日常小事想鬧人就會寫在那。只要控制到不將自己情緒發洩在Facebook，那就是成功了！

  
我戒Facebook其中一個主要原因，是因為Facebook太多人睇，私隱度太低，它的privacy policy好陰森，你好難去確保某些不想某人睇到的內容好安心地filter好，可能唔知邊個朋友like左，就將你那個post在他的newsfeed鋪天蓋地的迅速傳開去，舉個例工作上的辦公室政治，對某個朋友的不滿等等，一旦按個send，哼，真係不得了，傳開去的速度真的一發不可收拾，後悔也來不及。

說過的話，是收不回來的，所以女孩子要管住把口。

這句話我從葉玉卿一個訪問聽回來的，覺得好有道理，好多時一些爭拗，就是源自雙方都不能控制自己把口。Facebook send出去的，除非你決定delete，否則一直都有人知道你說過這樣的話。

如果是藝人要保持知名度，沒辦法，她要經常upload，跟粉絲互動打成一片，要定期露一露事業線同長腿。但作為一個普通人，沒必要將自己的事每天上載告知他人。

的確地，Betty身邊好多朋友已經不用Facebook，我們會私底下whatsapp，像Janet她經常whatsapp我，去旅行、shopping買到靚野，在街見到核突佬，公司見到個靚仔，開心唔開心的事～ 私隱度100分，可以暢所欲言。

說到底，Facebook也只不過是炫耀的地方，當你沒什麼要曬俾人睇，就再沒有用Facebook的必要。說真的，無用Facebook後，我個人係開心左，唔擔心自己講錯野，又唔使見到人食好住好同自己有比較。

門當戶對 II

在我舊blog我寫過一篇門當戶對，我發覺這個term應用範疇非常廣，尤其在我幫有錢人打工後，令我個人對人對事都好實際，再無一些不切實際的瘕想。

有錢人孤寒大家聽得多，其實美其言係節儉，不過有錢人要臉，兩個思想加埋好多時就變成cheap。好似我老闆有一日同我講佢打包左啲食物叫我去拎返，我以為好多啦，所以唔想拎叫我去拎，點知係幾塊豬肉。平時開支酒都幾萬蚊，竟然節儉幾塊豬肉，仲要點個秘書去攞。好多時有錢人花錢都係為個面子，對自己員工好孤寒，因為佢覺得你已經收緊佢人工，唔使對你咁好。但bell boy tips都有500蚊，朋友的司機就1000，秘書？食蕉就有。

我家少爺讀國際學校，老闆娘英文唔好，好多時都帶埋我去聽講座，開家長會咁。可能你好驚訝秘書要做埋呢啲野，不過走在校園，其實好多有錢太太都請個女仔做翻譯，跟小朋友的學習schedule，咪睇小呢啲，小朋友返學仲忙過佢爸媽。講真其實Betty我幾enjoy做學校，無咩壓力，又可以學下點培育一個十項全能的小朋友 （畢竟Betty都希望有朝一日可以做個好媽媽既）。學得最多既，就係有錢太太的談吐、衣著同禮貌，佢地可能本身係有錢女，又或者嫁到個有錢老公。有時小朋友去玩、上堂我都會幫手聯絡，啲太太響電話都好nice，坦白講，我Betty從來都無諗住高攀做人地朋友，我都係打份工同人social。到響學校見到，佢即刻好避忌同我講野，笑下就彈開，咁我就明哂—- 其實都岩既，始終大家係唔同世界既人，我年紀都細好多，在情在理都唔需要同我「咁好傾」。呢啲咪叫做識做人囉！響電話唔會得失你，見到面就畫清界線但又不失一份禮貌。學野啦，各位想嫁入豪門的姊妹！

其實識男仔都係一樣。好多朋友都好驚訝我而家「宅」的程度，我有近一年無出去識男仔。坦白講，到我呢個年紀，又唔係未玩過，靚仔、有錢仔、鬼仔、矮仔、醜仔、無錢仔我都識過，我就係知道當中其實無咩分別，男人骨子裡個個都係一樣，都係信唔過，當中有錢仔係最惡搞，男人有錢90%會出去滾，另外10%係純粹無膽去滾。靚仔嘛，絕對是可以go ahead的一群，因為男人醜同靚仔都係咁衰，所以一定要揀個高大靚仔，起碼生個B都靚啲～如果你老公靚仔但無錢，你更加可以好放心，今時今日仲有幾多小三純粹睇你老公靚唔靚仔？同樣地你老公醜樣但有錢，佢仍然有好大機會出去滾，當然都要睇埋個男仔的性格同成長環境，有啲真係純同好仔，但香港為數不多，反而我覺得外國成長的都乖啲純啲，始終無咁多引誘，生活又悶啲，自然乖乖地響屋企做個好老公。以上都係我觀察身邊朋友的實例。

  
所以嘛，有時實際係好事，當你知道個世界係點轉，你就跟住轉，不要發夢事事都有例外：徐子淇唔介意同個秘書做朋友，好多有錢又靚仔的俾你揀，老闆好鍾意你，希望年年加你人工。come on! 當你預左唔會有太好的事發生，當更差的事真的發生了，you will just be not surprising at all，咁你先會活得開心同有動力去繼續嘗試做好自己爭取值得自己擁有的。