金童玉女的殞落

Stephy同Alex這一對分手，好多人都有好多揣測。
Disclaimer: 我不認識他們倆，亦沒有匿藏在他們床下底偷聽，以下只是個人感覺。

方力申沙沙滾係人都知，想當年陳自瑤露出雙乳的影片，依Betty娛記朋友的十分可靠消息，拍片人正是方力申，當時陳自瑤前男友蔡其駿慘食死貓但無任何抹黑女方搏宣傳，真的是好一個gentleman。Stephy單親家庭長大，性格獨立堅強，一路以來方力申都對Stephy的愛take it for granted。坊間有些低能的謠言說Stephy是不婚主義者，試問有邊個女人想嫁唔去？邊個女人唔想結婚？睇Stephy訪問，就知其實佢係好想結婚，只係Alex無主動開口，安於現狀，所以Stephy說「我的世界不存在童話」，就是方力申的廢話，我們會好像童話裡的王子與公主，幸福快樂的生活下去。

一個唔主動求婚的男人，都是自私的男人。一齊10年，結唔結都無乜關係啦，而家咪幾好，我愛你，你愛我。唔結婚，對男人係百利而無一害，離婚不用分身家，仲可以繼續出去溝女，簡單點來講，無任何責任。但對女仔來講，係好蝕底，浪費青春不在話下，跟你10年，竟然一點名份都沒有。

一個人容忍有限度，有時積存太耐，就算是一些小事trigger到情緒，回不了頭的決定就是這樣出來的。

作為跟Stephy差不多年紀的女人，我可以斗膽的講句，Stephy肯定有後著。你32歲，會唔會無端端乜都無之下斬纜？純粹係你呢一刻頂唔順方力申？頂唔順，不是一朝一夕的事，只係大家騎牛搵馬，直到有一匹白馬出現，咁Stephy梗係跳糟啦，仲同你方力申繼續蹉跎咩！人地32歲了，人生有幾多個10年？

就算呢一刻方力申想結婚，Stephy都去意已決。男人就係犯賤，當初不娶Stephy，就是為了自由，同覺得Stephy不會離他而去；如今自己都36，沒想過突然間會一無所有，早知如此，何必當初？人永遠總是失去了，才懂得珍惜。

觀察我身邊的朋友，的確是7年之癢，拖，勿拍太久，合久必分。好多人見仲後生唔想結婚住，但到濃情轉淡，就會無左呢顆衝動，食之無味棄之可惜。我成日都同Janet講，唔好再拖快點結婚，但她不想就咁一世，其實既然有嫌棄對方之心，咁結婚來做乜？Janet唯一想嫁的理由，就是自己已經30歲，要搵個歸宿，唔想老左要一個人，或者到30幾歲無人要要做老姑婆，但其實佢又唔愛Anthony，即係有得揀佢唔想揀Anthony，但暫時又無第2匹靚馬可選。坦白說，我有些擔心他們，Janet講得岩︰「其實我都唔好得你幾多！」單身反而無咁多煩惱，多左個人就多了一個人影響自己情緒。

祝願Stephy找到一個真正愛惜她的人。方力申嘛，要再搵過個閃婚都唔難，緣盡了，只能各散東西。祝福~!♥

見工攻略

Betty已經極速搵到工兼返左3日工了！Betty過完年後2月中好求其咁send左幾份resume出去。

第一份係一間law firm through agency，phone interview之後條友第2日打來叫我即日去見，那天Betty無洗頭梳了一個high bun，著得好hea，又乜都無帶，亦無任何心理準備，於是拒絕了。跟住隔左成個星期佢都無聲氣，我email問佢is the job no longer available? 佢竟然唔覆喎，喂，答句yes都好丫，呢d咪係騎喱既agent囉，可能佢有candidate見得成份工，唔再需要我，就唔再睬我，這叫unprofessional!

第二份就係靚仔那份，之前已說，唔講了。

第三份，即係現在做緊呢份，其實都靜左一段日子，係Betty last day前一星期叫我去見，因為返緊工所以要6點後或lunch time去，跟住個agent話咁不如我約你3月1號啦。Betty覺得呢份工都不知咪路，請人都可以咁拖法，所以不存在任何期望。加上返緊工個人唔係幾得閒，心態上也無咁緊張份工。見完agent其實都隔左成個幾禮拜agent先通知我可以見公司，即係這個星期一的事，見完個COO好鍾意我，即刻拍板請我，仲叫我第2日返工。Betty媽月頭做手術，要陪媽媽覆診，就遲一日上工，對方都好open-minded，於是呢份工就響無乜期望﹑無乜緊張﹑唔係好知發生什麼事之下上工了！

1. 心態
   有時世事是好奇怪的，當你愈唔恨，就愈放在你面前；愈恨，就愈得唔到。我成日都話搵工就好似搵男朋友咁，Don’t Try Too Hard。周不時都聽人講，陪朋友選港姐，結果入圍的是自己，搵人陪飲野諗住識下男仔，結果識到的是陪你去的朋友。所以見工攻略第一樣最重要的，就是心態。

   唔好俾人覺得你好恨份工 (當然有誠意係必須)，同你之前份工做得唔開心，或者做得唔好。做人，唔使咁坦白，但無叫你講大話，係我師兄教的，到而家都銘記在心。

2. 笑容
   笑係俾人第一印象，尤其Betty係見對人的工作，無人想日日見到個黑面神。笑，係女仔不用錢的化妝品，一個成日笑的人俾人感覺好舒服，同想進一步了解你。
3. 早到
   何止要準時，直頭要早到。Again見工係公司對你的第一印象，實情你係咪成日咁準時唔重要，但見工早到俾人有非常好的印象。而且你早一點床，化靚個妝，悠閒咁出門口，吃點東西先去，個人都會定點。而且早去你可以觀察下間公司，周圍望下環境同d同事，你會大概知道間公司係點。
4. 借洗手間
   這個亦是早到的好處。Betty通常一去到間公司就會借用洗手間，去個廁所，舒緩緊張情緒。照下鏡check下牙齒有無殘餘食物，唇膏有無塗出界，頭髮有無亂，條裙有無繞起，有無成臉油光，總之overall望下自己個樣。
5. Eye Contact
   同人講野記住望住人對眼，這是自信的表現，唔好周圍碌俾人感覺唔自在。當然又唔係牛咁眼啦！
6. 大方回答問題
   你預左對方會係針對性問點解你想轉工，或者辭職，事前諗下點樣答，因為係100%問硬的，練埋用英文同普通話點答，這個咁重要的問題要重點預備。當然仲有自我介紹，諗定約1分鐘，不要太長或太短，範圍其實好簡單︰邊度畢業﹑之後做過咩industry﹑講下對上份工，覺得唔夠可以加埋興趣，已經好夠你講，亦令interviewer對你有基本的認知。其實佢都係睇你談吐同組織能力，睇下你講野係咪一pat屎，因為佢睇你resume已經知你大概的背景，講多無謂。其他根本上好靠你本身英文同普通話好唔好，唔好唔好死撐，咪話自己上緊course想improve英文同普通話之類。
7. 勿噴濃烈香水及化太濃的妝
   除非你係見化妝小姐，否則別痴假睫毛或畫超粗眼線。香水其實可以唔噴，因為每個人對香味的感覺都唔同，或者個interviewer唔鍾意那種味道，咁印象又無咁好。Betty當天噴了Jo Malone English Pear，好清淡高貴的氣味呢！
8. 勿揹名牌手袋
   揹名牌俾人感覺唔實際同貪慕虛榮 (當然實質上並非如此！)，但話明係印象，這些令人誤會的舉止可免則免，但又唔好揹太肉酸的手袋，一係買個黑色，一係抹一抹乾淨個袋，更加唔好掛住隻熊仔，這些俾人感覺幼稚。個人建議買Furla/ Marc Jacobs，唔太貴又有點牌子，而且款式都斯文大方。

   

9. 買對靚點的高跟鞋
   Betty最近入左對Jimmy Choo，係好貴，但著得好舒服，著起腳型都靚好多，行步路都自信過人。靚高跟鞋，是繼胸圍同手袋後最值得投資的item!而且都係買1,2對旁身。
10. Be Target-Oriented
    好多人搵工係漁翁撒網，其實我唔同意。諗清楚自己想做什麼﹑什麼樣的工作環境﹑地區，然後專注去搵，咁樣你見的工同你的期望唔會爭太遠，時間都慳返唔少。當然當你篩選工作先send resume，你見工的機會係少左，但我認為命中率會高一點。

總括來講，見工係講印象，你有幾叻幾好唔係重點，你哈佛畢業，但講野一舊屎，狂妄自大，件西裝皺哂，成頭頭油又遲到，咁係人都驚左你。而事實上，好多人見工時同實質的工作態度係兩碼子事，that’s why好多僱主都覺得呻笨自己請錯人。我舊公司的90後妹妹，見工時話自己好鍾意早到，去到邊都早15分鐘到 (當然包括返工)，咁我admin同事 interview時聽落覺得好舒服，而最後佢都幾經常性遲到，早佢15分鐘個頭呀！

所以呢，識扮野係好重要，一份好工﹑同一個好老公好多時都係呃返來。你用咩手段唔重要，呃到返來就得啦！點樣維持係另一件事，始終請左你，要炒你都麻煩，整走你都要點心血；結婚同一個道理，要離婚都要搞手續﹑又分身家又贍養費，好多人無必要都不想走到這一步。

吸引萬人迷

每次我看見一對漂亮的couple，我最感興趣的是”How they met?”

Brad Kroenig是Karl Lagerfeld用了超過12年的Chanel愛將，能夠吸引到世界第一設計師的賞識，此男定非普通的模特兒。於是我開始search有關他的事情，也找到了他老婆Nicole的一篇訪問 “I’m Married To A Male Supermodel”，我極度建議各位姊妹一看！

讓我來簡述一下，Nicole來自Miami，同Brad有一位mutual friend，有一次Brad來Miami探這位朋友，朋友說要介紹他們兩個認識。Nicole知道他是做model，在google search了一下，不得了，Brad是知名品牌Chanel, Fendi, Hermes的御用模特兒，勁出名同勁靚仔，Nicole當時覺得，這樣的男生，應該只想要個fun weekend，不會是認真的，所以她好型的甩底無去到朋友為他們安排的晚飯。第2日是星期六，Nicole照常返工，佢仲強調當日無化妝，著左件Tee同牛仔褲，點知Brad突登來搵佢，仲話佢昨晚甩底，今晚一定要同佢食飯。就係咁樣，一段好羨煞旁人的戀情就開始了。

重點是，基本上一開始Brad已經起左痰，對Nicole好有興趣；而Nicole雖然講到好輕描淡寫，但我想她成功的地方，就是甩這個萬人迷的底！基本上，男人in general都是犯賤的動物，對他愈好，他愈不珍惜，尤其以Brad來講，出到街係女仔圍住佢，搭飛機係空姐寫紙仔留電話俾佢，誰料到竟然有人甩佢底？！這增添了他對Nicole的好奇心，及想擁有的決心。當然，我相信Nicole是一個好charming的女仔，斯文大方。

生左個仔Hudson好得意，是Chanel Kids model

倪震之前出書寫過他追周慧敏的心得，最後還令她這樣死心塌地︰

        萬人迷，其實就是普通人，你當他是萬人迷，他自然就高你一等；你當他是普通人，他就立時和你平起平坐。萬人迷一樣要吃飯、拉屎，一樣有性需要、愛需要。有 多少人迷他不重要，他迷不迷你才是關鍵。要萬人迷迷你，最重要的是不卑不亢，你一副尊崇他在萬人之上的態度，太長他人志氣，也把自己fans化了，實在很 難令他有愛上你的衝動。
　　不要高估他，不要低估自己，萬人迷可以不愛萬人，偏愛你。但首先，你要忘記他是萬人迷。
　　已故的戴安娜王妃，是萬人迷了吧？你看，她離婚後，多少事後證明不是好東西的臭男人和她有過親密關係。他們，都不是她的fans；他們，都知道她有多普通。萬人迷的目光，只會平視，不會朝下看。你的信心，你的機會，就由你看清楚他是和你一模一樣的普通人開始。
　　情人眼裏出西施，情到濃時百花豔。一個人愛上另外一個人，是電光石火間的事，不是論條件稱受歡迎程度的。

的確，莫說是Princess Diana，周不時我們都發現身邊的萬人迷最後的另一半都不怎麼樣。正如Nicole所說，TIMING好重要，剛巧他分手了，剛巧你們認識了，剛巧他已見盡世間所有靚女想settle down了，就是這樣。

我經常覺得，這個世界周街都是靚女，一個女仔不可以只靠個樣，需要培養內涵，幾靚的女仔看得久都會膩，日子久了也會老，所以最緊要keep住好的體態，同倪震所講 — 一顆耀眼的自信心！

最後，就是群一班「好圈子」的朋友，Nicole這位朋友識一個咁出名的model，都不是泛泛之輩，有返一定的network。Betty都開始filter那些騎哩﹑沒甚用處的「朋友」。係呀，人就是這樣實際，你不filter人，人也會filter你！正如我之前所講，人愈大愈少朋友，Betty都暗暗地被嫁得好﹑做到高職位的朋友filter out了。所以，不必要覺得內疚，人總是要力爭上游，身邊留著2-3個死黨閨蜜，已經很足夠了。

胡杏兒和胡定欣

將胡杏兒同胡定欣一起比，好像有點奇怪，畢竟她們的背景都好不相同，但同樣曾獲得視后。我把她們聯想在一起，是因為在影視上，我覺得胡定欣好努力，而且能歌善舞，好有potential，相反囧囧樣的胡杏兒，都不知道憑什麼走紅。再看她們身邊的另一半，令我好有興趣分析這兩個人，同一個我之前說過的topic — 女人要懂得包裝。

回看自己寫的「包裝」，很稚氣，也覺得自己太偏激。無論是Queenie定Annie的手法，其實係好普遍，只係Betty太純太戇居，先覺得人地咁做好似天跌下來咁，天地不容，真係好白痴！

回正題，首先講下胡定欣。其實我幾鍾意佢，佢無乜學歷，唱歌比賽出身，由低做起，一開始形象不鮮明，我是由舞動奇蹟開始留意到佢，有幾多個香港女演員可以咁演而優則舞，佢跳舞好叻，好努力，身材又好。做戲呢，起碼我唔反感。

現任阿叔音樂人男友

而她的男朋友，個個都無個好。先是吳浩康，聽聞胡定欣更曾經為左佢落過仔。「先入為主」這首歌真係講中哂這個臭男人。之後都係d又無錢，又對佢唔好的男人。睇報導﹑同睇過佢的訪問，胡定欣都是一個不懂修飾自己的女仔，大笑姑婆，沒甚儀態，俾人感覺好low。作為一個觀眾，我就是喜歡胡定欣的爽直，男仔頭，靠自己的努力上位。但聽聞佢上任男人就是因為她港女﹑臭脾氣﹑不解溫柔而飛起佢。

好，到胡杏兒。科大畢業，港姐出身，正牌美貌與智慧並重。雖然有唱歌，但也不是怎出色，演技…… well，我一路都覺得佢無，但唔知點解套套劇都擔正，仲拎埋視后。胡杏兒就是識做人。

而過往的男朋友，個個唔係有錢就靚仔，首任是IT混血兒，現為鍾麗淇的老公，之後就應該到Bosco，當時是TVB一線小生，師奶殺手。到最後嫁俾Play的老闆Philip，又靚仔又有錢。無可否認，胡杏兒好識包裝自己，一行出來感覺就是classy，識得融入好的圈子，就是醒目女將自己歸納到classy的定位。36歲，依然嫁得好好。

女仔將自己包裝和定位看似容易，但到執行的時候其實好難。首先以background來講，胡杏兒的確係有學識﹑有教養的人；而定欣係在比較複雜的環境成長。

當然Philip係咪真係咁好無人知，作為一個觀眾，坦白說都是看表面而作出不太中肯的評論。可能定欣真人真係好難頂都唔定，但我是仍然喜歡電視螢幕中爽朗真性情的胡定欣。

提外話，周秀娜盛傳俾大陸有錢佬包，其實又有乜咁出奇？娜姐是另一位我很欣賞的女藝人，佢出身草根係大陸妹，但好有腦，佢係走性感，但俾人感覺唔cheap，搵夠佢亦即刻封胸，自己搞生意。佢以前的那位男友Avis Chan，如果不是因為娜姐，邊有機會拍喜愛夜蒲？其實有多少個女星無俾人包過？如果付出青春蝕底埋俾人最後什麼也拿不到先叫戇居！睇下李嘉欣同關之琳都唔知拎左幾多億先走人。娜姐就是一個很知道自己想要什麼﹑同自己在做什麼的一個聰明女人。

別讓自己沉淪下去

不知道大家有沒有很氣餒的時候，例如唔知自己想點，覺得自己好無用，但又唔敢將自己實質的情況同感覺同人講。

Betty屋企每個新年都會去求籤，今年亦是我第一年很認真的去求姻緣籤。第一次我覺得自己求錯左，因為我係問黃大仙爺爺「我今年嫁唔嫁得出」，其實我無諗住咁快嫁得出，於是前幾日我自己去求多次，今次係問「有無一個條件好的男仔可以發展」。巧合的是，兩支都是下下籤，而且講既野係一樣！爺爺話我遇到的都是海市蜃樓，看似美好，實質是很壞的潛伏。

求完之後好唔開心，因為覺得今年又是食白果的一年。

我講過好多次，我很討厭人將我地呢啲適婚而又未嫁得出的女仔歸納成「要求高，不切實際，個人性格又衰」的一群人。事實上，我見過好多嫁得出都擁有以上性格。我信「命」，尤其經歷了這麼多，我真的相信有些人的確是姻緣薄。

鍾嘉欣嫁俾大佢十幾年的老公，也是命，重點是她覺得自己幸福就好，為何人要judge人家搵幾多？幾多歲？嘉欣揀得佢這個男人一定好錫佢。

Betty要跳出死胡同，辭左職就開始搵工。地點在中環，外國公司，得幾個員工，夠簡單，Betty喜歡。一開始是phone interview，全英文，對方口音也是native，好明顯係ABC，到上去見工，係一個好靚仔，好高，好後生的男仔！佢吸引我的不只是外表，係佢一份氣質，好有禮貌好decent，還有他的email對答，係好得體。佢最後無請我，但佢覆我email拒絕得我來又好客氣，我係好欣賞佢！

Betty打左大陸人太耐工，我都覺得自己係不斷的deteriorated，公司無咩制度，英文最好那個已經是我，成公司都是師奶，不是得過且過就是等生仔，對於好似Betty未嫁性格又比較sociable的人，就像一只被困在籠中的雀仔。

  
所以這位interviewer的出現，深深的震動醒我，除左我好耐無識過男人 （oh my gosh I know!)，仲要係咁smart咁decent。雖然無機會同佢共事，但令我覺得自己的起心肝離開是十分正確的決定！當你感到自己生活好沉悶，做事提不起勁，自信心每況愈下，就係時候要改變自己！最起碼是改變工作環境，轉工又好，去下working holiday又好，就是需要點沖擊！

Don’t complain，別讓自己沉淪下去，take some actions，轉工or whatever，扮靚少少。就算自己不如中環其他儷人，起碼令自己貼近、貼近、再貼近一些。