Janet又出動介紹男仔我識，是他哥哥在美國的朋友，10年無回過香港，很多路都不熟悉，所以自動請纓帶他行旺角。此男打算在美國開一間賣香港小食的cafe，算是探下路吧。Janet做足功課又send埋相我睇，captioned ‘my brother’s good friend, nice guy, above average looking but not tall’。我反正有空，而且我都不抗拒任何機會，所以加埋Janet男朋友Anthony就4人行去掃街。
入正題前，講開介紹，前排有網友說我expect Tasha在婚禮介紹男仔俾我好過份，我想澄清一下，第一，係Tasha自己話佢有好多男同事，佢老公都有好多朋友會出席，所以都好希望我可以在她的婚禮上識到個好男仔。Tasha同Janet的做法已經係好唔同，Janet係會付諸實行，Tasha係覺得你要識總會識到，係緣份，而她的婚禮是一個機會，thats all and good luck girl。有expectation唔代表係「過份」，有時介紹呢家野係睇有無心，同埋看那個人的性格鍾唔鍾意做呢d野。譬如Tasha失戀時，我將自己電話簿的單身男仔朋友都介紹佢識，帶佢出去玩﹑BBQ，我同Janet就係同一類人，Tasha係好懶做呢d雞仔媒人，這是性格。
好多人都好「關心」Betty的戀愛狀況，但有9成八卦完就算。應該咁講，我覺得好少有Janet同我呢類人，我地係鍾意gather up the people，簡單的如去玩，又或者就算新相識傾下計知道你無男/女朋友，就會毫不猶豫話下次約埋她的single fiends一齊飲野呀，我地就是just want everybody have fun那種人。Tasha呢，就是你單身又唔關我事，我又不知道那種人適合你，我要返屋企陪男朋友呀—-我覺得，好多好多像Tasha這種心態的人，而好少好少像Janet咁熱心同慷慨的女仔。
OK，講返這個美國回來的男仔，俾個名佢安仔啦，因為佢全程就是呆下呆下，可能Jet lag呱。Anthony在美國跟Janet初拍拖時跟他一起打過war game，但安仔只流露出十分迷惘的表情︰「哦…… 係咩？我~唔~記~得~啦！」到夜少少就做精神返少少，開始講他在美國撞過幾次車的經歷，此時Janet十分不識趣突然問他︰
「喂，你仲有無搵Wendy？」
面都黑哂，好大反應︰「無啦！搵來做咩！」
Janet嘻嘻地跟我說︰「Wendy是他以前女朋友。」
其實，關我咩事呢？
Janet: 「聽講我地學校附近開左好多越南餐廳，有無去周圍試下？」
安仔︰「我呢D一支公，邊個同我去食丫。你阿哥就唔同啦，成日周圍食野，有女朋友嘛」
我覺得成句句子都好奇怪，咁大個人無話有無人陪，恨拍拖恨到講出口。唔記得講下安仔的外型同背景，年約36歲，168cm，Janet說above average looking就不是了，而且完全沒有ABC的氣息，衣著同個樣像個經常流連深水步黃金商場的宅男。而依照Janet的口述，他好多年前已經開鋪頭賣war game用品，應該有點錢。而他給我的感覺是，當新相識一個女仔，他會好懷疑對方是否貪他的什麼，我這樣一個宅男，你喜歡我什麼，簡單點說是好自卑。再說今天Janet搞這次大龍鳳，好明顯係想介紹我地兩個識，而作為一個男仔，他是超級的被動，無主動同我講過野，我意思是就算是新相識的朋友，都可以傾下計，佢俾我感覺係想識女仔，但又唔想好明顯食住上，又要扮下矜持「我無諗過來香港識女仔」。
利益申報我對佢無興趣，所以我都唔care佢對我有無。不過就一個30幾歲suppose待人處事好成熟的一個男人，佢對我的態度就唔係幾friendly囉。我覺得好多單身男仔都係衰自卑，想識女朋友但又扮哂唔在乎，唔想去做主動；除非你係吳彥祖o者，否則你何德何能要個女仔主動去識你呢？又假設你係吳彥祖，你對我咁既態度我都唔敢聯絡你啦。
或者又咁講，可能佢對我絲毫無興趣，所以唔需要進一步做什麼或者同我講野。但如果我是一個單身男人，我不會抹殺任何一個識女仔的機會，召左入宮你都可以唔寵幸佢，但你連召都唔召，何來有個女朋友從天而降？
Ada話，年紀有返咁上下，又有點錢/事業的男人都會好多野諗，擔心這樣又驚那樣。各位男士，放低你的自卑，放開你的胸襟，我不知道現在女追男有幾狼死，不過作為條件不太標青又年紀唔細的男士，你是需要勇敢地踏出第一步。從來受歡迎的男仔，都是給女仔感覺好溫暖，平易近人的人。這個邏輯其實男同女也是一樣吧！
be.betty 