話咁快就6月尾了，距離我決定是否去英國愈來愈近，我想過了6月，我就要認真去考慮去向。我這個年紀，出走真的要相當大的勇氣，除左去要使一大筆錢，也很擔心回來後找不到好似現在這份咁好的工作。我本來諗住10月先算，但想了又想，如果去，愈早去愈好，無謂再拖，所以我由6月開始已經留意身邊的人和事，我很希望遇到一些東西令我留低，但至今仍然沒有。
之前提到我公司新來的VP，我很有好感，他非常斯文，洗杯關雪櫃都可以無聲，搞到相對地我好粗魯咁！而且佢係超級有禮貌，我已經好耐無遇過咁decent的男人。直到上星期從同事口中得知，他10月要結婚了！知道後有如晴天霹靂，好失望…… 失望唔係因為我什麼喜歡上他，而係難得遇到一個覺得好的，而手上沒有戒指，結果他都是輪不到我…… 那種失落感比失戀更慘，幻得幻失，真係好sad~
好多朋友覺得我去英國係為左識男人，唔值得放棄香港所有野，其實唔係架！去外國生活係我從小到大的夢想，我唔諗住好specific得到什麼，就是一個體驗，和完成自己的夢想。夢想可能對於某些人來說是戇居﹑不切實際，但能夠拿出這份勇氣一點也不容易。我去到希望讀個書，將英文練得更好，識一點外國的人脈，如果我去，我唔會令自己白枉此行，我一定要拎到一點東西回來，我唔知會是什麼，但這是我的目標。
最近我盡最後的努力識男朋友，的確識左幾個男仔，都有whatsapp下，暫時都沒有強烈感覺，但我真係太耐無同男仔date過，所以practise下都是好事，眼神﹑講野技巧，同埋有更大的動力keep fit。
自從我2月見工見到個靚仔僱主後，我開始的起心肝要注意自己的身型。作為女人，「唔肥」不是我們安於現狀的理由，我們是要fit!!! 而fit係要做運動練返來，當然加埋diet。我去跑步時望到個月亮，就是靚仔個樣，同佢好forth﹑隔住裇衫都見到胸肌的身型，令我跑到快虛脫我都要繼續鞭策自己跑下去！妳要優秀的男人，就要令自己也是優秀的女人，而身材好是女人的必須。
當日見工的僱主，跟陳智燊有9成相似，說話時講英文似吳彥祖
我現在一食個公仔麵，就有好大的罪惡感，同埋一覺得個肚腩大左，就會去gym同跑步，因為跑步實在辛苦，所以好節制自己食野，當你知道亂食野跑10個圈也減不回來，你就會好乖咁戒口。基本上我日間咩都食，但夜晚戒澱粉真係瘦得快。我覺得減肥咩都唔食又好慘同好難持久，所以我日間仍然會食我鍾意食的東西，朱古力﹑蛋糕我都食，只係食少d。
今個星期有人約我睇戲，唔知會係點呢？其實我都幾開心將自己推返去正常軌道，當然要遇到心動的男人係好難，仲要係單身的，不過就算練習下做個朋友都好呀！
be.betty 