重出江湖

Betty最近開始去返events，去左食brunch同飲野。過去2年實在太自閉，正如Janet所講，TO SEE AND TO BE SEEN 係好重要，心態上我都只係想見返多點人，識下新朋友，重新適應同陌生人傾計的技巧。

前陣子我和Janet絕跡events，除左那排黑仔識埋d無質素仲要我AA制同佢食飯嚇怕左我之外，就係其實應酬人，某程度上都幾攰，首先笑係必須，喂，笑足成晚喎，都咪話唔攰，又要講野，又要著靚少少化靚個妝去，希望每位男士嘗試appreciate下女仔花時間裝扮自己去跟你赴會的心意。

Betty昨天就去左跳舞，之前朋友帶我去過一次，覺得幾好玩，係partner dance，圍住個圈，男仔唔郁，係女仔郁，所以基本上你會識哂所有人，男仔仲可以摸哂所有女仔的手仔同纖腰，哇哈哈！初時我都有點怕醜，始終無咁近距離接觸男仔一段時間，同時地我都feel到有些男仔好緊張，隻手勁多手汗。我朋友都搵跳得好叻的男仔教我跳，而d男仔，都幾OK架！而且跳舞都好有風度，首先我唔識，佢要帶得好好，又唔會俾人撞到同踩到我；另外其實跳得叻的，同無數女仔跳過，所以佢地唔會怕醜，感覺好有安全感。

 
昨天的是跳舞班，正式去學basic steps，但有好多係couples，我自己的朋友都是3對couples! At first feeling very left out，好彩最後導師都係打散哂d人。但看得出那些女生，完全係起哂鋼，見到自己男朋友攬住另一個女仔，那種殺氣，真係離遠都感覺到。有個女仔，即刻除左件外套，露出低胸小背心，其他男仔梗係發達啦，我做女仔都睇到眼突！女人，其實真係可以做到好絕架！不過我心諗，係女人都有一對胸，爭在肯唔肯露，同是否願意請對方食波餅，唔好咁巴之閉啦，低能！

跳舞來說，男仔好重要，係lead住個女仔，同要保護佢唔俾人踩到。由於d男仔都係beginners，唔識得保護我，Betty俾隔離個近6呎的鬼佬一腳踩埋來，相信度力有200-300磅，嘩！痛到我丫！再之後再俾另一個踩到腳踭。活動後檢查傷口，瘀左一大撻呀陰公！超痛呀！今晚捽鐵打酒應該好快變紫紅色！真係著絲襪都遮不住。

 
總括而言，好好玩！但一定要有朋友陪，仲要係識跳的朋友。我見到有d女仔自己2個人來又唔識跳，又唔識人，儘管係真心來學跳舞，但感覺上就係來溝仔，搞到好cheap。呢d咁既情況，真係要著低胸小背心，發下姣放下電就會有男仔自動過來話教你。

Where Are the MEN?

題目我標得好保守，我已經不說Good Quality/ Decent Men，就只是Men！真的，不知道為什麼走在街上，阿叔就多，好難見到個四四正正30出頭的男士。大家不妨留意下地鐵車廂。

Betty返工搭電梯，都好少見到靚仔，阿叔就有，真係唔知點解。就算到而家轉左公司，咁大幢大廈，我都無見過一~個~靚~仔！請別誤會Betty發姣，有睇我blog都知我不是如斯膚淺的一個女子，而是真的，點解會咁難搵到一個靚仔？究竟靚仔去哂邊？

我留意街上﹑自己工作的大廈很久，其實中環區已經算很不錯，男女比例比較平均，但基本上仍然係女多過男好多。我去行山，20個人得5個男仔，甚至有些成group都係女仔。香港男女失衡是很認真的﹑他媽的嚴重。像我們這些讀書時，或初出來工作時mark不到一件筍貨，現在再識一個真係好好好好好難！

我都有研究過在女多過男這樣多的一個情況下，為何仍有男士說好難識女仔，我非常真心的覺得，只要你有眼耳口鼻有頭髮又唔太矮，係無可能無女朋友。作為女生的我，對於這個言論，感到很矛盾，因為真的不知道有幾多個正常而又單身的男生(而明知正常的不會是單身，唉) 。只可以跟自己說，have faith in yourself，自己努力爭取，餘下的就看緣份了。

所謂的努力爭取，就是起碼俾自己見到男人。工作關係主要跟女人共事，以前我去clubbing識朋友，現在我選擇一些較健康的活動，例如行山和跑步。

Betty以前都有去屋企附近的公園跑步，今天心血來潮，跑去更遠的公園，是隔了一個地鐵站，除了沿途多野睇之外，個公園原來好靚，種左好多白蘭花，一路跑一路嗅到好香的花味，令人心曠神怡！我發現有好多人來跑步，而且男仔佔大多數。想不到我尋尋覓覓，又去旅行又去clubbing，都不及我在公園見到猛男的數目。好多男仔好大隻，樣亦唔錯，始終來得跑步都係注重健康的人，或者有做開training的人，Betty鍾意健康健碩的男仔。所以Betty真的覺得，get the right circle係好重要，而且公園好集中，基本上跑跑下又會見返對方，咁當然係幾靚仔所以認得佢啦！

想不到我日常生活中搵個男人都難，但原來公園是男人的集中地，唔使錢，能夠自己減肥，又有eye candies，Betty得閒就要去跑公園！

Overcome Loneliness

Betty是一個很獨立的女生，獨立得令男生覺得不可愛。我很想告訴男生們，沒有女生與生俱來是獨立的，是家庭和生活迫出來的。例如有些女生，來自破碎家庭，有細佬妹，咁佢細細個就要迫住獨立；像是Betty我，唔知點解由細到大讀書同工作圍繞住的都是女人，就算有男人，都是那些不太 gentleman的人︰水機換水係自己換 ，搞event物資幾重係自己拎，夜左係自己一個返屋企，我係慣左好多事都要自己動手做，但這不代表我不想有人錫同關懷。

Betty 亦試過好幾次自己去旅行，起初其實接受不到，好想有人陪，但搵人陪去旅行仲慘過求契爺，就時間﹑地點﹑搞一大輪跟住又話唔得。坦白講，如果不是男朋友，真係好難搵個肯咁就你的一個朋友。所以有一天，Betty火鬼滾自己一個出發，原來係好ok的，買張機票就行得，唔使plan，唔使就人，鍾意食乜就食乜， 去邊就去邊，其實好爽！而且每一次我自己去旅行，都會識到朋友，不過都係女仔 (命呀~~~) 咁當然其實我都想有人陪，始終玩法唔同，但我係好ok自己去旅行的。

只要你overcome到這個關口，其實個人會開心好多。但在香港呢，我係好唔鍾意自己出街，所以無人陪我的時候，我多數留在家，或者去做yoga。

最近唔知痴左邊條筋，開始在想既然咁得閒，想好好善用時間。讀書？唔讀啦，Betty同自己講過就算再讀，我一定係去外國讀；睇書？我都有既，但天氣好好留 在家睇書好似好浪費；想了又想，我發現做運動是最值得不過！時間消磨得快，又可以減肥！但又遇到「無人陪」的問題了，除左Betty的朋友都好忙之外，其實我自己本身都好憎約人，約來約去我都去左了。而且運動係一種習慣，唔係約食high tea，於是Betty上星期做左三樣第一次︰

1. 自己去吐露港踩單車
2. 自己join行山group去行山
3. 自己跑去隔一個地鐵站的公園

但原來係比想像中開心的 (真架！唔係安慰自己)。踩單車其實就算約埋一班朋友，最後都係各自踩，而且吐露港我踩過好多次所以好熟路。而join行山group呢，2016 New Year Resolutions都講過，其實想左好耐，約極都約唔到人肯同我去，Janet成日依依哦哦，佢呢啲靚女得閒去係去做facial，在家訓下晏覺，得鬼閒同你去行山；Tasha要湊仔，其他朋友真係好難約，有些weekend要返工。我又好怕自己一個去好似好怪咁，又驚無人同我講野，自己好戇居跟住人行！結果呢，事實係好多人都係自己一個人來，同埋總有些人好nice傾得兩嘴，所以又是心態問題了，你預左係一個人先，咁行山都係想享受自然風光同減肥啫，咁到時真係無人同你講野都無咁難受嘛！

就咁聽落Betty係咪好似好慘？無朋友到咁既地步。其實我初時就係overcome不到這個感覺，所以制紂左好多自己想去做的事情。事實上，能夠搵到個同你有相同興趣的朋友真的很不容易，就算Janet同Tasha肯陪我去，都只能夠係一次半次。行山group的人都是熱愛戶外活動的人，Betty會繼續去的，希望去多一兩次識到朋友，咁以後再去就不是自己一個啦。

 
在此分享Willie Booker “Life Is Too Short To Date Men Like Me” Overcome Loneliness的一節，每一次睇返都覺得好inspiring:

1. Don’t act over-eager
2. Don’t be desperate
3. Be Confident
4. Be happy by yourself

下篇講我去公園跑步的見聞。